SHILLONG:
U Myntri ba dei peit ïa ka tnad bording ha ka sorkar jylla u Abu Taher Mondal,u la kren shai ba ka jingpynmih ïa ka bording elektrik na ka Wah Umiam ka lah ban poi haduh u pud u sam ban hap sangeh noh lada ka jingtyrkhong ka mariang kan dang bteng.
Haba kren bad ki ladpathai khubor u Myntri u la ong ba ka don ka jingsngewkhia kaba jur halor ka jingduna um ha ka Wah Umiam, namar mynta u snem ka um ka duna palat haba ïa nujor bad ki wei ki snem.
“Kumba ka long ,mynta ka um ka don tang 3165 phut bad ka dei ka ba duna tam namar ka jingdonkam ban pynmih ïa ka bording ka um ka dei ban don 3170 phut bad lada kane kan dang ïai bteng ban duna ngim banse ban hap ban pynsangeh noh ïa ka jingpynmih bording elektrick na ka wah Umiam”, u la ong.
“Ka ju don ka jingkheiñ ïa ka jingdon ka um ha ki dam ban lah ban pynmih ïa ka bording eklektrik hynrei lada ka duna ïa kane ka jingkheiñ ngim banse ban hap ban pynsangeh noh ka jingpynmih bording, kumba ka long mynta ngin dang pynneh kumjuh bad ngin hap ban shu kyrmen ba ka jylla kan sa ïoh slap noh namar la dei ka artad ka aïom”, u la bynrap.
Ha kaba ïadei bad ka jingjurip jong u Myntri ïa ka damsite hynnin ka sngi, u Mondal ha ryngkat ka Meghalaya Power Generation Corporation Limited bad ka IIT kila hiar ban jurip ïa ka Umiam ban peit ïa ka long ka man jong kane ka Dam.
“Ngi la hiar sha kane ka dam ban peit ïa ka long ka man jong kane ka dam, bad ha ka jingpeit ki ïohi ba ka long ka man jong ka dam ka dang biang wat la katta ki la shim ïa ka rai ba ka IIT kan khmih bniah ha baroh ki bynta kum ïa ka Ultra Sound bad kiwei ba kin lap tynrai ïa ka long ka man jong ka jingkieng,” u la ong.
U Mondal u la bynrap ruh da kaba ong, “Lada ngi peit nabar ka paw ba ka long kaba biang hynrei ïa kaba shapoh pat ym lah ban tip bad ïa kine lah ban tip tang hadien ba la dep pynlong ïa ki test bapher bapher ki ban sa leh noh ha kine ki sngi ki por ban wan.”
U la ïathuh ruh ba hadien ba la dep kine kiei kiei kin sa kylliang noh ïa ki nar jong ka jingkieng, ka kompani ka la trei shakhmat ïa kane, mynta ka komapani kan sa peit ïa kane kumno ban leh.
“Ïa ka jingkieng yn khang ïaid kali na ka bynta 3 haduh 6 kynta ha kata ka sngi ba ki shna ïa kane ka jingkieng , bad ïa ki kali yn pynïaid noh nawei ka lynti, ha ka sngi ba bud ki lah ban leit hynrei ïa ki kali heh kin ym shah, tang ki kali rit kin shah ban ïaid lyngba,” u la ong.
U Myntri ka tnat bording u la bynrap ba kine kin ïaid bad kin sa pyntip ruh ïa ki paidbah kiba ïaid ba ieng ba kin tip.
“Ka IIT kan pyndep kloi kat ba lah ban pyndep ïa ka jingpeit bniah jong ki,” u la ong.
U la bynrap ruh da kaba ïathuh ba ka jingkieng ba thymmai ka ban rung sha Nongbah Shillong ka dei ban leh da ka PWD, kala don ka jingsorjamin ïa kane ka surok bad ka Geological Survey of India ka la bthah ba kam dei ban pynlang khyndew namar kan kthah ïa kane ka jingtei kaba la don lupa, bad kane ka ïaid sha khmat bad kane ka surok kan ïaid lait na kane ka jingkieng kaba don mynta.
