SHILLONG:
U Bah Ardent Miller Basaiawmoit, u President ka Voice of People Party (VPP), u la ong ba mynta ka kynti , baroh ki jylla ha ki dong shatei lammihngi bad ka Ri India, kan ïohi ïa ka jingïatylli jong ki jaitbynriew Khasi ,bad ym dei shuh ban kynnoh ba u Khasi ym ju lah ban ïatylli hynrei kane kan kut noh mynta bad ka jaitbynriew kan leit sha ka pyrthei kum ka jaitbynriew kaba ïatylli
U Bah Ardent Miller Basaiawmoit u ba odn hapdeng ka jingïakhih da ka ba shah thngan la 8 sngi lynter ban pynbor ïa ka sorkar ban pynbeit ïa ka reservation policy ka ba noh shiliang , mynta ka sngi hadien ba u la ïoh ban pdiang ïa ka shithi ba ka sorkar ka la pdiang ïa ka jingdawa ban ïa kren halor kane ka mat u la ieng na ka jingthiah ban ai ka jingkhublei ïa ki hajar ngut ki paidbah ki ba la wan ban ai mynsiem ïa u ha kane ka jaka.
Ha ba kren sha ki paidbah u Bah Ardent u la ong “Naduh mynta ka sngi ka jingkynthoh ba ka jaitbynriew Khasi kam ju ïatylli kan long sa tang ka jingkynnoh namar naduh kane ka khep, ngin pyntylli, ngin ieng tylli u Khynriam, u Pnar, u Bhoi, u War, u Maram, u Lyngngam ngi dei kawei ka jaitbynriew Khasi”.
“Ngin ym shah ban don ki bor ki ban pynsngewthuh bakla ban pynpait pynpra ïa ngi bad ban pynsniewdur ïa kane ka jingïakhih jong ngi, bad ngi dei ban ïoh ïa kaei ka ba ngi la dawa ban ïoh kata ban pynbeit ïa ka reservation policy, ka party kan leit ban shimbynta ha ka jingïakren bad ka sorkar ka dei ban ai ka jingmynjur na ka bynta ban pynbeit ïa ka reservation policy”u la bynrap.
U la ong shuh shuh, “Lada ka sorkar kam mynjur, ngan ym khih na kane ka jaka, ngan bteng ïa kane ka jingshah thngan, bad lyngba ka jingdwai jong ki ba bun, nga long kumne kumba nga long mynta bad ka dei ban don tang ka wei ka jingpyrkhat, kata ka long ban pynbha pat, ban pynim pat bad pynkylla dur ïa kane ka Ri baieid jong ngi, na ka bynta ki 40 -50 snem ki ban wan ngim kwah ban ïaid matlah kum ba ngi la ïaid matlah ha kine ki 50 snem ba la dep”.
U Bah Ardent u la ong, “Ka VPP ka don ka thong ka ba shai bad ka don shibun ki kam ki ba ka hap ban leh ban pynbeit ïa ka ne ka jylla jong ngi, kane ka long tang ka jingsdang ngin hap ban jop ïa kane, ngin hap ban ïaleh ruh ïa ka thma pyrshah ka jingbamsap, ka ba long ka daw bah ban ktah ïa ki khun samla jong ngi” .
“Nangne shakhmat ynda la jop ïa kane ngin dang don shibun, kiei kiei ki ba ngin shim ban pynthikna ïa ka lawei ba phyrnai jong ki khun samla ,ka VPP kan bud dien ban pynbeit ïa ka jingdkhoh hangne phin ïohi ïa ka bor jong ka jingïakhih ka ba ïaid da ka lynti ka ba jaijai”u la ong.
U Bah Ardent u la kyntu ruh ïa ki paidbah ba “kim dei ba pynmih ïa ka jingkulmar ha kum kane ka khep ka ba la jan ka jingjop namar ba lada don ka jingkulmar ka dei ka sorkar ka ban kmen, namar kata ka daw ngin ym kmen ha kata ka jingriam ka sorkar , ngi lah ban bitar ban sngew synei ïa u Bah Ardent u ba la shah thngan mynta ka 8 sngi hynrei ngin jied da ka lynti ka ba jaijai ym ban pynmih jingkulmar”.
U la ong shuh shuh “Kam mut ba ka jingkhot jong ka sorkar ïa u Bah Ardent ban ïa kren halor ka Reservation policy , ngin song noh ïa ki tiar ki tar ban ïakmen ban ïaleit noh sha ing em, ngin ap ïa ka jingmih na kata ka jingïakren bad lada kata ka jingïakren kam pynhun ïa ngi, ngan bteng ïakane ka jingïakhih shah thngan”.
“Nga ngeit ba ka sorkar ka ïohi ba kane ka jingïakhih kam dei tang ha kane ka jaka, hynrei ka jingïakhih ka dei na baroh ka Ri baieid jong ngi, ki ba la wan ban ai mynsiem ïa nga naduh ki jaka khappud ki ba jngai. Kane ka dei ka sien ba ki jylla ha ki dong shatei lammihngi bad ka Ri India, kan ïohi ïa ka jingïatylli jong ki jaitbynriew Khasi, ngim dei shuh ban ong ba u khasi ym lah ban ïatylli hynrei kane kan kut noh mynta, ka rukom ïa kren kata ka rukom pyrkhat ngin leit sha ka pyrthei kum ka jaitbynriew ba ïatylli”, u la bynrap.
