SHILLONG:
U dkhot jong ka Regional Committee, Ri-Bhoi district, kaba la thaw dang shen da ka sorkar jylla haba ïadei bad ka jingthmu ban pynbeit ïa ka jingïa kajia pud hapdeng ka Jylla Assam bad Meghalaya ha ka bynta kaba ar u la ong ba un sa ïakren bad ki paidbah ha shuwa ban shim kano kano ka rai kaba khatduh.
“Lada ka Sorkar ne ka Regional Committee kam sngap ïa ka sur jong ki nongshong shnong kiba shong ba sah ha Khappud, nga la dep kren shai ba ngan don bad ki paidbah, bad nga ïoh kane ka kyrdan kum u MLA namar nga jop dei na ka daw jong ki,” la ong u dkhot ka Ri-Bhoi Regional Committee uba dei ruh u MLA ka seng Congress na Mawhati u bah Charles Marngar.
Kat kum ka jingïathuh jong u bah Charles Marngar, ki don Shibun ki kynhun kiba pyrshah ïa ka jingïasoi ïa ka soskular ne ka Memorandum of Understanding (MoU) hapdeng ka Meghalaya bad Assam, ha ka bynta kaba nyngkong ban pynbeit ïa ka jingïa kajia pud ha ki hynriew tylli ki jaka , hakaba la pynlong ruh ïa ki nongïalam shnong bad Hima ban leit ujor pyrshah ïa kane ka soskular sha Supreme Court.
“Kane ka pyni ba ki nongshong shnong jong ngi kim hun haba ïadei bad ka MoU kaba la dep ban soi hapdeng kine ki artylli ki jylla ha u Snem ba la dep ha ka jingïadon lang jong u Union Home Minister Amit Shah,” u la ong.
Ula bynrap ba kum u dkhot jong ka Ri-Bhoi Regional Committee u ba dei na kane ka thaiñ u tip bha ïa ka jingeh kaba ki nongshong shnong ki ïa kynduh.
U bah Marngar u la ong ruh ba kaei kaba un pynsngew sha ka Regional Committee kam dei ka rai jong u shimet hynrei kan dei ka rai kaba la shim da ki nongshong shnong jong kito ki shnong, namar ka wei ka bynta kaba ki peit ka dei na ka jingkwah bad jingthrang jong ki paidbah.
U la bynrap ruh da kaba ong ba ka jingïapynbeit pud bad ka Assam lada ka jaka jong ka Meghalaya kan leit sha ka wei pat ka liang hangta ki paidbha riewlum kin ïa kynduh Shibun ki jingeh.
U la ong ha Assam, ki riewlum kim don ka hok longtrai ïa ka khyndew ka shyiap bad kin hap ban siew khajna. Wat ka kolshor, ka ktien ka thylliej, ki rukom shad tynrai bad ka riam ka beit kan shah ktah, lada kine ki jaka ha Block II kiba hap hapoh ka jingpeit jong ka Raid Nongtung kin leit sha Assam.
“Lada ka bynta jong ka jaka ka leit sha ka wei pat ka jylla, kin hap ban bud ïa ki aiñ ki kyndon jong kato ka jaka,” ong u bah Marngar.
U la pynpaw ruh ba ha ka rukom bad khyndew ha Assam ne ka ‘Land Regulation Act of Assam,’ ka la kren shai ba ki paidbah kim don ka hok halor ka khyndew ka shyiap.
Une u dkhot ka Regional Committee u la pynpaw ba ha Meghalaya ki riewlum ki don ka hok halor ka khyndew ka shyiap, ha kaba u la bynrap ba kane ka dei ban ïaineh.
Ha ka juh ka por u bah Margnar haba kren halor ka mat kaba ïadei bad ka Karbi Anglong Autonomous Council (KAAC) jong ka jylla Assam, kaba khrong khajna na ki kali kiba kit synsar na ki jaka kiba hap hapoh ka jylla Meghalaya, u la ong ba u la rah ïa kane ka mat hapoh ka ïingdorbar thawaiñ ha ka Dorbar Mang tyngka, ha kaba u Myntri Rangbah u Conrad Sangma u la kular ba un shim khia ïa kane ka mat bad u Myntri Rangbah ka jylla Assam.
“Nga dang ap ïa ka jubab la ka sorkar Meghalaya kan shim khia ne em ïa kane ka jingeh kaba ki paidbah ki ïa kynduh ha Khappud, lada ngi pynslem ban ïakren bad kumba long mynta ka jingshim khajna ka dei man ka sngi na ki nongrep synsar ki ba hap ban siew haduh 15, 000 tyngka shi kali,” u la ong.
U la ïathuh ruh ba na ka liang ka jong u, u la leit ban ïakynduh ïa u Chief Executive Member (CEM) ka Khasi Hills Autonomous District Council (KHADC) u bah Titosstarwell Chyne , uba la kular ha u ba un shim khia bad ban thoh sha u CEM ka KAAC. U bah Marngar u la ong ba lada ym leh eiei kloi kat ba lah halor kane ki nongrep kiba shong ba sah ha kito ki jaka kin sa ïa kynduh Shibun ki jingeh.
