SHILLONG:
U Symbud Myntri Rangbah ka jylla, u Bah Prestone Tynsong u la pynpaw ka jingbym sngew ïahap halor ka shithi ba la phah da ka Harijan Panchayat Committee (HPC) ban kam ba ka jingtyrwa jong ka sorkar halor ka jingpynkynriah ïa ka jaka shong jong ki ka long ka bym biang, bym ïahap, bym pat pynkhreh, bym shong hok bad ka bym ïadei dur bad ka synshar paidbah.
“Hato phai sha ka jingpynshongnia, ki ong ba ki la don hangne mynta la 160 snem. Hato kata ka long kaba dei? Hato kata ka long kaba shisha? Ngam kwah ban kren palat ïa kata. Lada ki kwah ban pyni bor, ai kin pyni bor,” la ong u Bah Prestone Tynsong ha ka 21 tarik Ïaiong 2023.
U Bah Prestone Tynsong u ba la sngew dom u la ong shuh shuh ba haba ki la ïoh ïa ka shithi na ka HPC, u la ong ba na ka liang jong ki um shym la don ei ei shuh ban ong namar ba ka jaka ba la jied ban pynkynriah ïa ki ka long kaba itynnad, kaba hap hapoh ka European Ward.
“Ka jingdawa jong ki ka long ban ïoh ïa ka jaka ba 200 sq.mitar bad T20 lak ha man ki unit. Kumno ngin pdiang ïa kata? Naduh ka sngi kaba nyngkong, nga la ïathuh ïa ki ba ngin sa don ïa ka blueprint kaba lah ban pdiang na baroh arliang mamla- namar ha kane ka juk mynta ka long kaba eh ban ïoh ïa ka jaka,” la ong u Bah Prestone u ba dei ruh u chairman jong ka High Level Committee (HLC).
Shuh shuh, u la ïathuh ba kin sa khot biang ïa ka jingïalang ban ïaken halor ka jingthmu jong ki watla u la pynpaw da kaba ong, “katkum ka shithi, i kumba kim kwah hi ruh tang ban ïa shong ha ka miej ban ïa syllok halor ki jingmyntoi bad ki jingeh. Mynta kane ka wan na ka High Court ba ngi donkam ban pynbeit noh. Ngin sa lah ban ong tang ynda ngi la phah ïa ka affidavit sha ka High Court.”
La pynlong ïa ka jingïalang ha ka 21 tarik Ïaïong da u Myntri ka tnad kam poh ïing ka jylla, u Bah Prestone (Police) u Bah Prestone Tynsong ha ryngkat ka jingïadon lang u Myntri ka tnad Urban Affairs, u Bah Sniawbhalang Dhar ryngkat kiwei pat ki nongtrei kam jong ka sorkar ban ïa syllok halor kane ka mat.
Ha ka jingkren ba la ai ha ka 20 tarik Ïaïong, na ka liang u secretary ka HPC, u Gurjit Singh u la pynpaw da kaba ong “ki jingdawa jong ngi ba la pyni ha ka mat jong ka “Eight-point resolution” ka ïeng skhem bad ngin ym rung hapoh ka jingpynbor jong ki seng saiñ pyrthei namar ka dei ka jingsngew jong ka sorkar ban leh kumta bad ruh na ka jingtyllun jong ka por, kane ka jaka ka la long ka ktem ki kam khaïi pateng.”
Ha ka 29 tarik Nailur 2022, ka sorkar jylla ka la ai ïa ka blueprint sha ka HPC ha ka por ba long jingïalang, kaba la pyni ïa ka rai ban tei ïa ka building bun mala ha ka jaka ba dei ki quarter jong ka Shillong Municipal Board (SMB) na bynta ban kynriah ïa ki 342 tylli ki longïing.
Ka sorkar jylla da kaba kylluid ka la kyntait ïa ka jingtyrwa ba la ai da ka HPC ha ka 25 tarik Ïaïong 2022 ba ki dawa ban ai mar 200 sq.mitar ka jaka sha man ki 342 tylli ki longïing hapoh ka European Ward laitnoh ka bailut baisep na bynta ki jingtei ïa ki ïing jong ki.
