SHILLONG:
U MLA ka Nongkrem Constituency u bah Lambor Malgniang u la pynpaw ïa ka jingbym sngewïahap halor ka jingphah tohkit ha ka CBI ïa ka jingjia Mukroh namar kane kan dang bam por.
Haba kren sha ki lad pathai khubor mynta ka sngi, u bah Lambor u la pynrem jur ïa ka sorkar Assam kaba hapdeng ka jingïakren ban pynbeit ïa u pud u sam da ka lynti ba beit; hynrei wan jia ka jingjia kaba sngewsih.
U bah Lambor u la ong, “Kaba kham sngew lyngngoh bad thamula ka long ba ki pulit Assam ki la wan rung ha ka jaka bym don ka jingïakajia bad ka jingleh ka sorkar Assam ka pynartatien ïa ki nongïalam ba ki jaka bym don ka jingïakajia ki wan bad siat pathar te ngin ïakren kumno pat ïa ki jaka ba don ka jingïakajia hapdeng ki ar jylla.”
U la ong ba kaba kham bitar ka long ba balei ki pynumsnam ïa ki bym don tiar ïaleh ‘hynrei kiba dei tang ki nongrep bad ka bor pulit Meghalaya ka tlot haduh katta katta, ïa kaba ym khmih lynti ban poi haduh katne bad wat ki pulit ruh ki hap ïa rieh lang bad u paidbah ha ka por ba jia kane ka jingjia’. “Kane ka dei ka jingtieng bad lada shi kilometer ki la wan ban rung bad siat pathar kata ka mut ki dei ki lehnoh ka sorkar Assam,” u la bynrap.
U bah Lambor u la ong ruh ba kum kine ki jingjia ym dei ban ailad bad dei ban bud ïa ka jylla Mizoram bad lah dei ban ai hukum ban siat lang ïa kiba rung haduh ka jylla. “Nga sngew ban ong ba na ka por sha ka por hapoh ka ïingdorbar thawaiñ nga la wanrah ïa kane ka mat ban thaw da ka Meghalaya Regiment ban buh da ki briew lajong ban ïada ïa ka khappud,” u la bynrap.
U bah Lambor u la ther tyngeh ruh ia umyntri rangbah ka jylla Assam bad u la kam ba kiba siat ki dei ki lehnoh kiba wan da ka Uniform Assam Police ‘kaba imat ka Assam ka la pynmih ïa ka kynhun lehnnoh Assam ban siat ïa ki briew ka jylla Meghalaya.
“Halor kane ka jingjia ban ap ïa ka jingtohkit CBI, kan bam por da ki snem. Ngi kwah ban shimkhia kyrkieh bad lano ngin ap ïa ka CBI. Dei ban kem mardor ïa kiba donkti bad lada ki pulit jylla ki biang, ki lah dei ban siat beit ïa ki pulit Assam, hangto hangto bad lada ap ïa ka jingtohkit CBI baroh la ïa klet lut hynrei dei ban shim ka sienjam kaba mardor ïa kiba donkti ban pynïap ïa kine ki briew kiba lui lui,” u la ong.
“Ka jingpynpaw jingbitar ki seng ka dei bad mano bym dom ïa kane bad ngi dei ki jaitbynriew kaba ritpaid, kane ka paw ka jingbymlerkam ka sorkar jylla bad ka mat jingpynbeit ïa u pud u sam ka la i artatien bad ka don ka jingbitar bad hap ban ïakhih namar ba ki la bakla. Hynrei kane ka por ba ki khynnah skul ki hap leh exam bad ki nongrep kin hap die ïa ki marbam, kin ïakhih jai jai bad ngi ai ka jingkyrshan ïa ki ban ïakhih ban ïoh ïa ka jingdawa ban pynshitom ïa kiba donkti ban pynïap ïa ki nongshong shnong,” u la bynrap.
