SHILLONG:
U General Secretary ka Khasi Students’ Union (KSU) u Bah Donald V Thabah u la ong ba kan dei ka jingkit khlieh jong uwei pa uwei u nongshong shnong ban mih ryntih ban pynkhih win bad weng ïa ki ktem shipai jong ka Border Security Force (BSF) ha ki thaiñ Ri War.
Ïa kane u la kren ha ka lah sngi U Blei, ha ka jingïalang ba la pynlong ban pynpaw ka jingsngewlem ïa ki bahaïing ha sem jong u Bah Roningstar Nongkynrih, u ba la shah siat ïap ha ki shipai BSF ha ka 5 tarik Jymmang ha ka shnong Mawshun.
Ha ba kren ha kane ka jingïalang u Bah Donald u la ong “Ïa u nongkhaïi drok, u nongtuh, u nongbatbor, kim leh eiei ki BSF hynrei ïa u briew u ba leit ban bylla ki siat balei?”
“Lada ïoh ban kem ïa ki 2 ngut ki khar Bangla ki pynmih khubor, hynrei naduh u snem 1971 da ki lak ngut ki khar Bangla ki wan phi la kem ïa ki? Lada leit ha Shillong mynta kyrhai da ki mynder ki leh aiu ki BSF, ïa u Khasi pat ki pyndik na ka por sha ka por”, u la bynrap .
“Ki khar Banglasdesh ki wantur sha Meghalaya ban rep u BSF u leh aïu, khlem leh eiei hap ban leit hi da ka KSU Jaiñtia ban pynpra ïa ka rep beaiñ ngin leh aïu ïa uta u BSF para dkhar ki ïarap. Ki BSF kim dei ki Border Security Force kim ïada ïa u pud u sam hynrei ki ïada tang para dkhar, ngim lah ban pdiang ïa kane da leilei ruh”, u la ong.
U Bah Donald u la ong shuh shuh, “Ki la ong ban buh ka jingtohkit halor kane ka jingjia, wat la ki buh ka jingtohkit 100 tylli ruh ngim tip hynrei ngi dei ban ïoh ïa ka kaiphot ka dei ban set along shi jingim ïa ki BSF ki ba donkti, ym ban shu pynkynriah kam ne ban shu pynsangeh kam shipor ïa ki”.
“Ka dei ka kamram jong ngi uwei pa uwei u nongshong shnong ban mih lang ban pynkhih win ïa ki ktem BSF ha them Riwar namar lada ngi shu sngap ngin ïai shah siat, kumno ki bor shipai ka sorkar India ka ju kheiñ ïa ngi ki paid riewlum baroh ngi ju sakhi ïa ka jingthombor ha kylleng ha thaiñ shatei lammihngi”, u la ong.
“Ha ka 5 tarik u rangbah u ba shu kit ïa ka masi ka muid ki siat balei ki shu siat hato u kit ïa ki tiar pynbthei seh ban hap siat? Katno ka jingtmang ka ïing ka sem une u rangbah u ba la shah siat ïap ha ki shipai. Ha ka 5 tarik u Jymmang ha Mawshun ki sawa ki ktang suloi, ki her ki kuli bad ka jaitbynriew Khasi ka kyllon ha madan bad lyngkien ka snam ha surok, kumba ngi ju ïohi na ka por sha ka por”, u la bynrap.
“Balei ka jingim jong u Khasi, jong ka jaitbynriew Khasi ka ju shah kheiñ poh katta katta? Hooid namar ha Ri India jong ngi ïa ki ST ki kheiñ ba ki dei ki jaitbynriew ki ba pohjait bad ki ba ki lah ban pynïap ban siat katba mon ka jingpynïap jong ki ïa u Bah Roning kan ym don jingktah eiei ïa ki namar ki ong uwei u la khyllem ïa ki wei ruh ngin pynkyllem”, la ong u Bah Donald.
