SHILLONG:
U nongïalam ka party Congress, u ba long ruh u MLA ka Mylliem Konstitwensi, u bah Ronnie V Lyngdoh u la pynrem jur halor ka jingshah thombor uwei u pastor bad u tymmen basan na ka balang Presbytarian ha ka jylla Bihar.
Lah ban kdew hangne ba u Pastor Reuben G Laloo bad u Tymmen basan jong ka Balang Presbyterian, ha ka 11 tarik u ïaiong, ki la shah thombor ha ki riewsniew, ha ka por ba ki dang thmu ban leit ban ïa kynduh ïa ki missionaries ha ka jylla Bihar.
U Bah Lyngdoh u la ong ba “Uwei u pastor bad uwei u Tymmen basan ki shah rah ha police station Bihar, bad kane ka jia namar ba ngi dei na ka niam khristan, ka Ri aiu ka ba ngi don mynta lada phim dei na ka balang ba hehpaid ym long shuh ban ïaid ban ieng ban phla la ka jingngeit”.
“Kat kum ka Riti shynshar jong ka Ri India, ha ka article (25) ka ba la ai laitluid ban bud ïa kano kano ka jingngeit, ban pynsaphriang ïa ka jingngeit jong ngi, bad mano ba thaw ïa kane ? ka dei ka Congress ka ba la ïakhun ïa ka jinglaitluid mynta ngi don kata ka jinglaitluid? lada don ka seng ka ba burom ïa ka khynhun niam ka dei ka Congress”ka la ong. “Lada don kano kano ka seng ka ba lah ban leh pyrshah ïa ka BJP, kan dei ka Congress ka ba long ka national party ka ba don ha baroh kawei ka Ri India” u la bynrap.
U bah Lyngdoh u la ong ruh ba “ka BJP ka tieng ïa ka Congress haduh ba la poi u pud ba kin pynduh ïa ka jinglong member of parliament (MP) u nongïalam ka Congress Rahul Gandhi ,bad lada kim tieng balei ki pynduh haba u kren ïa ka jingshisha ïa ka jingbakla ka sorkar BJP”.
“Kane kam ïapher shuh kum ka Ri Communist, lada ïa u nongmihkhmat ba la jied da u paidbah ym shah shuh ban kren ïa u hapoh ka parliament bad ka jingsheptieng jong ki, ka la poi haduh u pud ba kin pynduh ïa ka dkhot ka Parliament”u la bynrap.
Ha kawei pat ka liang, ka Khasi Jaiñtia Church Leader Forum (KJCLF) mynta ka sngi ka la pynrem jur ïa jingjia ban pyrshah ïa ki arngut ki ki nongïalam niam jong ka balang Presbyterian Laitumkhrah, u Pastor Reuben G Laloo bad u Tymmen basan T Nongkhlaw, ki la shah pyndik ha ki riew shim kabu katba ki dang don ha ka lynti ban leit sha ka lyngkha trei jong ka balang ka ba don ha Bihar ha ka 11 tarik Ïaïong 2023.
Lah ban kdew ba katkum ba la ïoh jingtip, kine ki arngut ki rangbah naongïalam niam ki la mad ïa ka jingbitar jong ki paidbah bad hadien katto katne la ïalam noh ïa ki sha thanad jong kawei na ki Police Station kaba don ha katei ka jaka.
La lah ban pynjai jai noh ïa kane ka jingbym sngewthuh jingmut lyngba ki bor ba dei khmih jong ka jylla Bihar hadien ka jingshimkhia na ka liang u Myntri Rangbah ka jylla u Conrad K Sangma.
Na ka liang ki bahaïing hasem jong kine ki rangbah ki la pyntip ba kin sa mih na ka nongbah Patna mynta ka sngi bad kin sa poi ha ka nongbah Shillong ha ka 12 tarik laïong 2023.
Na ka liang u Myntri Rangbah ka jylla, u Conrad K Sangma u la ong ba u pynrem ïa kane ka jingjia ba la jia ha Bihar ha kaba ki rangbah niam jong ka Balang Presbyterian ki la shah pyndik bad shah khang lynti ha ki riewrunar. Kumta u la kyntu ïa ki pulit ka jylla Meghalaya ban snoh kti bad ki pulit na Bihar kiba la ai jingïarap ïa kine ki rangbah khnang ban buddien ban ujor FIR pyrshah ïa kine ki runar.
Arsngi shwa ïa kane u myntri rangbah duh ka Ri u Narendra Modi u la leit ban jngoh ïa ka jaka mane ha ka Easter Sunday bad na ka liang kane ka kynhun ki nonïalam niam ki la kyrpad ïa ka bro ba halor ka Ri India ban peit ba ka jingshong shngaiñ hapoh kane ka imlang ka sahlang.
