SHILLONG:
Ka Sorkar Meghalaya Democratic Alliance (MDA-II) ka lah ban khot noh ïa ki nongïalam ka Harijan Panchayat Committee (HPC) mynta u taiew, ïa kane la pyntip da u Symbud Myntri rangbah ka jylla u bah Prestone Tynsong .
Ha ba kren sha ki ladpathai khubor u bah Tynsong u la ong , ka sorkar kam pat ïoh ïa kano kano ka jubab na ki nongïalam ka Harijan Panchayat Committee (HPC) ha ka ba ïadei bad ka blueprint ka ba ka sorkar ka la phah sha ki.
U Bah Prestone u la ong “haduh mynta ngim pat ïoh ïa ka jubab hynrei ha ki kot khubor nga la ïohi ba ki la pynmih ïa ka kyrwoh ba kin sa kynduh ïa ngi hynrei ka sorkar mynta u taiew hi kan sa khot ïa ki ban ïa kren ïa tai halor kane ka mat”.
U la bynrap shuh shuh “Ka Sorkar ka la dep ban ban phah ïa ka blueprint sha ki baroh, ïa ki jingtip bad mynta ka sah hi ka long sa tang ïa ki nongïalam ka Harijan ba kin ai ka jubab sha ka sorkar”. Lah ban kdew hangne ba ka Sorkar jylla ka la pan ïa ka jubab na ki nongïalam ka HPC, ha ka ba ïadei bad ka plan ka sorkar (Blue print ) ka la dep ban tyrwa sha ki na ka bynta ban pynkynriah ïa ki briew ki ba sah ha Themiewmawlong ha ka 10 tarik u Ïaïong 2023.
Ha ba phai sha u nongïalam ka Harijan Panchayat Committee (HPC) u Gurjeet Singh, u la ong ba ha ka ba ïa dei bad ka jubab halor ka Blueprint, ka HPC ka dang phah ban bishar ïa ki Expect ha kane ka lain ban peit la ka long ne em ka ba biang ban pdiang ïa ka bad kumba ka sorkar ka la pan ïa ka jubab, ka HPC kan sa ai ka jubab ha ka 10 tarik ,halor ka blueprint ba ka sorkar ka la dep ban tyrwa ha ka ba ïadei bad ka jingpynkynriah ïa ki Harijan na ThemiewMawlong.
