SHILLONG:
Ki shnong ka Koloriang, kaba dei ka nongbah rilum jong ka Arunachal Pradesh ka lah ban knieh noh na ka Mawsynram ïa ka nam kum ka jaka kaba jur slap ha ka pyrthei. Ka Koloriang ka dei ka jaka kaba itynnad ka jinglong jingman ka mariang kaba don ha Kurung Kumei district. Ka dei ka jaka kaba ïohi ïa ki ia ki lum kiba tap da ka ior, ki rithor, ki khlaw ba rben, kaba long kum ka paradise ïa ki riew ieid mariang.
Mynta ka Mawsynram ka dangbat ia ka nam kum ka shnong kaba jur slap tam ha ka pyrthei, kaba don ha East Khasi Hills district ka Meghalaya. Ka ïoh slap 11,871mm ha ka shisnem.
Hadien ka Mawsynram, ka Sohra ba ju tip kum ka Cherrapunjee kaba don ha East Khasi Hills ka Meghalaya ka dei kaba bud ha ka jingjur slap tam ha ka pyrthei bad ka ïoh slap kumba 11,359mm shisnem.
Ka Koloriang ka khring ïa kiba bun ki briew sha ka nongbah, kaba la pynlong ïa ka Indian Meteorological Department (IMD) ban buh ïa ka jaka thew slap. Da kaba ïoh ïa ka nam kum ka jaka kaba jur slap tam ha ka pyrthei, kan nangkhring ïa ki nongjngoh kai pyrthei bad kan ïarap ban kyntiew ïa ka ïoh ka kot jong ka jylla.
Kane ka nongbah ka don ha ka kynjang kaba 1,000 meter na sla duriaw bad ka dei ka jaka kaba ïahap ban rep baroh shisnem.
