SHILLONG:
Ka shnong Thynroit, kaba hap ha Mawkynrew Community bad Rural Development (C&RD) Block kaba paw bha ha ka jingdon ïa ki nongsumar ba tbit da ka jingstad tynrai bad ki dawai kynbat, mynta ka sngi ka la sakhi ïa ka jingwan buh mawnongrim ban kyntiew kyrdan noh ïa ka Thynroit Sub Centre sha ka Primary Health Centre bad kumjuh ruh ka jingplie ïa ka ïing skul ba thymmai jong ka ‘Thynroit Government L.P School’, da u Bah Banteidor Lyngdoh, MLA ka Mawkynrew konstitwensi uba dei ruh u myntri ba dei khmih ïa ka tnad kam rep bad kam ïalehkai jong ka sorkar Jylla.
Kane ka Sub-Centre ka dei kaba lah plie naduh u snem 1981 bad kat nang ïaid ki sngi ka jingai jingshakri jong ka sha kiba pang ba shitom kam kot bor shuh wat la ka dei kawei na ki jaka ai jingsumar ba tbit bha ba la ïoh jingithuh na ka sorkar Jylla bad na ka sorkar pdeng kumjuh. Halor kane ka jingeh, u MLA u la shim ïa ka sienjam ban kyntiew kyrdan PHC noh ïa kane ka Sub Centre bad shen yn tei ïa ka, ha ka jaka kaba heh, kaba don kumba lai akar tam ha katei ka shnong.
ïa kane ka PHC yn tei ha ka mang tyngka kaba la jan kot haduh T.10 klur bad kan long ka jingkyrkhu ïa ki nongshong ym tang na Thynroit hynrei ki shnong kiba marjan kiba lah nang roi, nang heh ha ka jingbun paid kat nang mih ki sngi ki snem. Katba ïa ka skul pat, kaba don ha katei ka shnong, kaba ym pat pynbha naduh kumba long mynshwa, kaba la don ruh 70 snem ka rta, lah tei ha ka mang tyngka kaba long T. 37 lak.
Ha ka jingïalang plie ïa u mawnongrim ban kyntiew kyrdan ïa ka Sub- Centre kumjuh ïa ka jingplie ïa ka ïing skul, la ïadonlang da u Bah Martle N Mukhim, MDC Mawkynrew, u Bah Medhistar Warbah, MLA barim ka Dienglieng konstitwensi, Dr. A Lyngdoh, DMHO East Khasi Hills, u Dr Shaji ML, Principal ka Good Shepherd Higher Secondary School, Jongksha, u Dr A. K. Nongbri, Dr. incharge Jongksha PHC, u Bah Harkin Warjri, Sordar Thynroit, u Bah Olet Kharsahnoh, Sordar Jongksha, ki nonghikai bad khynnah skul ka Thynroit Government L P School, ki nongshong shnong nalor kiwei pat.
Haba kren ha ka jingïalang, u Bah Banteidor u la pynkynmaw ïa ki por ba la leit u la ong, “Ki nongshong shnong khamtam ki longkmie ki la pynsngew na ka por sha ka por ïa ka jingdonkam ban kyntiew kyrdan PHC noh ïa kane ka Sub Centre bad mynta ka la urlong ha kaba shen yn tei noh ïa ka bad kan dei ka jingkyrkhu ïa ki nongshong shnong kiba donkam ïa ka jingsumar ha ka pang ka shitom.”
U la ong ruh ba kane ka Centre ka dei kawei kaba la ju ïoh khusnam na ka por sha ka por bad kane ka dei ka kynti ban ïoh kyntiew kyrdan PHC nalor kiwei pat ki kyrdan. “Kane ka dei ka jingdonkam kaba la angnud da ki nongshong shnong bad ka dei ka jingïatreilang jong ki bor shnong, ki nongshong shnong bad ka tnad ka koit ka khiah ba kane ka jingangnud ka la urlong,” u la ong da kaba bynrap ba kane ka PHC kam dei tang u mawnongrim hynrei la pynthikna ban tei noh noh ïa ka.
Halor ka skul, u MLA u la ong ba ki paidbah ki kynmaw mynshuwa ïa ka jinglong jingman kane ka skul bad lada ki ïa nujor mynta ka la pher bak-ly-bak. “Mynshuwa kim kwah wan skul shuh bad u Sordar u la pynsngew ïa kane ruh bad kumta mynta ngi la ïoh ïa ka building ba thymmai,” u la ong da kaba bynrap ba ka rukom ai jinghikai kan nang kiew nangne sha khmat ha kane ka skul.
