SHILLONG:
Ka Election Commission of India (ECI), ha ka 13 tarik Kyllalyngkot ka la bthah ïa ki kyrtong bad kumjuh ïa ki seng saiñ pyrthei kiba ai tiket ïa ki kyrtong kiba la shah pynngat aiñ na ka jingshah kynnoh kam bymman, ba ki dei ban pynbna paidbah lai sien lynter ha ki lad pathai khubor.
Ka kynhun jong ka ECI ka la wan hiar sha ka jylla Meghalaya ar sngi lynter ban bishar ïa ka jinglong jingman shwa ban pynbna ïa ka sngi thep vote.
Haba kren bad ki lad pathai khubor u Chief Election Commissioner (CEC) u Rajiv Kumar u la ong ba ka Commission ka la shim rai ban bthah ïa ki kyrtong kiba la shah pynngat ha ki kyndon aiñ halor ka jingshah kynnoh ha ki kam bymman, ba ki dei ban pynbna paidbah ha ki lad pathai khubor lai sngi lynter khnang ba ki paidbah kin tip ban bishar ïa ki.
U heh ka ECI u la ong ruh ba ki seng saiñ pyrthei kiba la rai ban ai tiket ïa ki briew kiba la don dak sniew, kin hap ban pynshai ha ki lad pathai khubor ïa ka daw ba ki la jied ïa ki kum ki kyrtong ban ïa khun na ka seng.
“Ki seng saiñ pyrthei ki dei ban pynshai ha ki lad pathai khubor balei ki la jied ïa u ne ka briew ba don ïa ka jingthoh bria ban long kum u ne ka kyrtong”, u la ong.
“Hato ka eh ban ïoh ïa ki briew ba khlem don jingthohbria ha kano kano ka konstitwensi, ki seng saiñ pyrthei ki dei ban ai ka daw, khnang ba ki nongthep vote kin tip ïa ki nongrim bad ïa kaei ka kam bymman ba kine ki kyrtong ki la shah kynnoh”, ula bynrap.
U Rajiv Kumar u la ong, “Ïa kine ki jingpyntip ki dei ban pynmih ha ka bynta ba hakhmat tam jong ka kot khubor, bad ha ki news channel khnang ba ki nongthep vote kin ïoh jingtip shaphang jong ki bad kan shong ha ki paidbah ba kin shim rai ba kin dang kyrshan ne em ïa ki”.
U la bynrap shuh shuh ba ka kamram ka ECI ka long tang ban buh ha khmat u paidbah ïa ka jingpynbna, hynrei kan shong ha u paidbah ban jied ne em ïa ki kyrtong ki ba la don ka jingthoh bria.
