SHILLONG:
Ki paidbah ka shnong Umthlong ka Dong Lummawnei, ha ka 10 tarik Kyllalyngkot kila sngew kmen ban ïoh ïa ka surok dewbilat kaba la pynshna na ka bhah u MDC u Bah Teiborlang Pathaw, hadien ba kila bam pum pum la bun snem mynta.
Ïa kane ka surok dewbilat kaba jrong kumba 3 km eiei, la mang na ka bhah u MDC kumba 17 lak eiei kynthup kaba u la ïarap ha ka por bym pat long MDC.
Haba kren ha kane ka jingplie ïa kane ka surok, u Bah Teiborlang u la ong ba lada u Blei u ibit bad ki paidbah ki jied ïa u ban long u MLA ka Mawlai ha 2023, un ïakhun tyngeh ban pynkhreh ïa ka jingtyrwa sha ka sorkar jylla ban shna surok 30 Km ha baroh ban pynïasoh da ka surok ïa ka Mawlai baroh kawei.
“Kum u riew shimet nga la ïadon bynta ban noh synñiang naduh bym long MDC. Hadien ba la jop kum u MDC nga la wanrah ka skhim ban bteng ban shna ïa ka surok shnong ryngkat ka jingïatreilang ka Balang, bad ka shnong”, la ong u Bah Teiborlang.
U la ong ba ka Mawlai ka donkam shibun ki surok bad mynta kum u MDC u la shim ban pyntreikam tang ïa kiba kham donkam kyrkieh, ym ba pynhun ïano ïano. “Don ki shnong ba ki paidbah ki la angnud la 20-30 snem hynrei nga khlem pynhun ïano ïano, nga pyndep”, u la ong.
Khnang ba ka sorkar kan kham shim khia, u Bah Teibor u la ong ba haba u leit ban ïakynduh ïa ki myntri sorkar, ki ophisar, u ju ïalam lang ïa ki nongkitkam shnong namar ba lada leit hi marwei ka shu sahkut bad kam don ka jingshim khia na ka sorkar.
“Lada u Blei u ibit ban poi sha ka thong ban long MLA, ngan buh ka jingtyrwa 30 Km ki surok ban pynpoi surok sha ki shnong ha Mawlai baroh kawei, ngan leit rah ïa ka jingtyrwa sha ka sorkar ba kan pynlong kam ïa ka surok”, la ong u Bah Teibor.
Ha kane ka sngi, la sakhi lang u Rangbah Shnong Bah Tyllilang Mylliemumlong, ki nongïalam Balang Presbyterian bad ki longkmie ki samla ka shnong.
