NONGPOH:
Ki la don kumba 4 ngut ei ei ki nongtrei bad kiba long kum ki nongpynkhuid ka surok saw laiñ ha Ri Bhoi, ki la shu lait thaw salit na ki jingjia ba sngewsih, kata hadien ba ka la don ka jingjia khyllem kynsan uwei u diengbah na ka khlaw Nongkhyllem.
Katei ka jingjia, ka la jia mynta ha ka por 2 baje ei ei nohphaisngi, kata ha ka por ba kitei ki nongtrei surok, ki dang shu dep bamja bad shongkai harud surok, hynrei ha kaba kum katei ka por, utei u diengbah, u la shu khyllem kynsan sha katei ka jaka ba shongkai kitei ki nongtrei surok.
Ha kaba kum katei ka jingjia, uwei napdeng kitei ki saw ngut, u la kham mynsaw jur ha ki bynta ka kti, ïa kaba la pynkit noh mar mar sha ki jaka sumar ha Nongbah Shillong, katba ïa kitei ki 3 ngut kiba la mynsaw malu mala, la shu sumar noh tang ha Civil Hospital Nongpoh.
Ha katei ka jingjia khyllem utei u diengbah, shipor ka la wanrah ïa ka jingsahkut kali hapoh ka surok bad kaba la pynlong ïa kiba bun ki kali, ba kin hap ban ïaid noh na ka liang bym dei.
Ka la shimpor kumba katto katne por ei ei ban pynkhuid ïa utei u diengbah, hynrei da ka jingtrei shitom ki Pulit lem bad ki nongtrei ka HNAI, la lah ban pynkhuid noh ïa utei u diengbah, uba la khyllem ha katei ka surok.
