SHILLONG:
Ki nongrep na ka thaiñ Mawkynrew, Mylliem, Sohryngkham, Umsning bad na kiwei pat ki jaka, kila leit sha MeCOFED ha Mawïong hadien ba la mih khubor ba la pyllait ïa ka dawa sboh ha Thynroit ha kine ki khyndiat sngi ba la dep.
Ha ka jingleit jong ki sha kane ka jaka ban leit thied dawai, kaba sngewsih ka long ba ki lap ba ki jaka buh dawai ki thylli, ha ka jingïakynduh bad ki nongpeit jong kane ka jaka ki ïoh jingtip ba haduh mynta ka dawai kam pat poi ha ka jylla jong ngi.
Haba ïakren bad ki nongrep kila ong, “Haba ngi ïohi lyngba ki lad pathai khubor bala pyllait paidbah ïa ka dawai sboh ha ka shnong Thynroit da u wei na ki riew rangbah uba dei ruh u Kyrtong jong ka NPP na Mawkynrew konstitwensi, katno ngi dap da ka jingsngew kmen bad mar mar mynta ka sngi, ngi la wan sha kane ka jaka ban wan kit noh ïa ka dawai, ha kaba ngi la wanrah ruh ïa ka dur EPIC ban pynshisha.”
Na ka liang kine ki nongrep kila dawa na ka Sorkar ba ka dei ban leh eiei ban pynshitom ïa u kyrtong ka National People’s Party (NPP), u Bah Kansing Lynshiang da kaba kynnoh ba u la thok ïa ki nongrep da kaba leh mynleh plie paidbah ïa ka dawai sboh myn ha ka 13 tarik u Kyllalyngkot, 2023 ha shnong Thynroit.
Kane ka jingdawa ki nongrep kala mih hadien ba kila lap ba ki kudam dawai sboh ha kaba don Mawlai Mawïong ki thylli bad bad ym don dawai sboh eiei khamtam hadien ba kila ïoh jingtip na ka MeCOFED ba ka bhah dawai sboh ha ka Jylla Meghalaya kam pat poi satia bad sah ha ka lyngngoh kumno u Bah Kansing u pyllait paidbah da kaba khap ribbon ïa ka trok kit dawai sboh ha katei ka shnong.
Kine ki nongrep ki la pan jingïarap ruh na ki nongkitkam ka Hill Farmers’ Union, bad namar ka jingbun palat ki nongrep kiba kylli bad wad jingtip shaphang ka dawai sboh, na ka liang ki nongkitkam ka Hill Farmers’ Union ruh ki la leit peit lang sha MeCOFED ïa ki kudam ban lap ïa ka jingshisha.
Na ka liang u Secretary ka HFU u Bah Alfonse Khawsyntiew haba kren bad ki nongthoh khubor u la ong, ki nongrep hadien ba ki ïohi ba la pyllait paidbah ïa ka dawai kila wan shane ban thied ïa kane ka dawai, u la buh jingkylli ruh kumno kine ki briew ki la ïoh ban leh mon haduh katne ban pynbiej ïa u nongrep u ba shi sur shidur.
“Ngim kwah ba mano mano kin shim kabu ïa u nongrep, ngi wan hangne ruh namar ngi ïohi ba la pyllait ïa ka dawai, hynrei phewse ynda ki nongrep bad ka HFU ki poi sha MECOFED ha Mawïong, ngi ïohi da la ki jong ki khmat ïa ka jingthylli ki kudam,” u la ong.
Uwei pat u nongrep haba kren ha kane ka sngi u la ong, “Ngi la wan khnang sha MeCOFED da ka jingkyrmen ban ïoh ïa ka dawai sboh namar ka la dei artad ka por ban thung ban tep, hynrei ki lap ba ka dei ka jingthok jingshukor namarba ym pat don satia ka dawai sboh ha kudam ka MeCOFED.”
Ha kawei pat ka liang, haba ïakren bad u Bah Manshwaki Pohshna uba dei u Fertilizer in-charge , u la pynshai ba kim tip ei ei ïa kata ka jingkhap ribon ba la pyllait ïa ka dawai sboh na ka bynta ki nongrep, namar haduh mynta, dang ap ban ïoh ïa ka dawai sboh kaba wan kum ka bhah jong ka Meghalaya na ka Sorkar India.
U la ïathuh ba ynda la pyllait ïa ka dawai sboh na ka bynta ki nongrep lyngba ka MeCOFED, yn sa don ka jingai laisen ïa ki Retailer ba kin ai ïa ka dawai sboh na ka bynta ki nongrep, bad ngim lah ban shu die kumto namar ngi hap ban ai jingkheiñ sha ka Sorkar pdeng ïa kat kaba ki ïoh ïa ka bhah katkum ka jingdonkam ka jylla.
