JOWAI:
Ka Hynñiewtrep Integrated Territorial Organization (HITO) West Jaiñtia Hills ka la lap bun ki jingduna ha ka jingjurip ïa ka Civil Hospital ha Ïalong bad ïa ka Namdong PHC.
Ki jingduna naduh ki tiar ki tar khamtam ki nongtrei ïa ki kor naduh ki X-ray, scanning, ultra sound bad kiwei kiwei.
U President ka seng u samla Pynbiang Rymbai ha ka jingïadon lang u General Secretary Sengkmie u Bah Wanbun N Dkhar kila kynduh ïa u DMHO ka West Jaiñtia Hills District u Dr. Ajar uba la pyntip ba ha ka jylla dang duna bha ki samla kiba pass ha ki Laboratory Technician bad kane ka pynlong ïa ki jaka ai jingsumar ban dkoh ha ki jingtreikam bad bunsien haba donkam ban leh ïa ki test ba bunjait hap leit shabar.
U DMHO u la ong ba ha ka jingshisha ki don bun ki dawai hynrei lada ki Medical Officer kiba dei peit ïa ki PHC, CHC kim pan dawai kumno ka ophis jong u kan tip ban pynbiang ïa ki.
Shuh shuh ka seng kala pynpaw ruh ïa ka jingpynslem ban plie ïa ka Maternity and Child Hospital Panaliar Jowai, ha kaba u DMHO u la pyntip ba ka sorkar ka la dep ban mang ïa ki kam ha katei ka hospital hynrei ki doktor pat ki dang duna bad dei halor kane ka nongrim ka jingplie ïa katei ka Hospital ka slem.
Ha ka jingjurip jong ka seng ïa ka Namdong PHC la lap ba don tang uwei u doctor Ayush bad 6 ngut ki nurse bad kaba pynlyngoh ïa ka seng ka long ba ïa kane ka PHC shen yn sa pynkyntiew kyrdan noh sha ka CHC hapdeng shibun ki jingduna bad kane ka lah ban long tang ka jingpynbiej elekshon namar bala jan ka elekshon.
Ka seng ka la bynrap ba ka sorkar ka la dei ba shim ïa ka sien jam ban pynjanai ïa ki jaka ai jingsumar khnang ba ki paidbah ki bym kot bor ban leit sha ki hospital riew shimet kin ïoh jingïarap naki hospital Sorkar.
