NONGPOH:
Haba shimkhia ïa ka jingujor ki paidbah, kiba la ujor sha ka seng halor ka jingpyntrei torti u Kontrator uba la ïoh ban pyntrei ïa ka surok na Warmawsaw sha Mawdem, ki nongïalam ka HYC Ri Bhoi Sepngi Circle, hynnin ka sngi ki la leit ban jurip ïa katei ka surok bad ki la lap shisha ba ka jingpyntrei ïa katei ka surok, ka la long kaba torti shisha.
Ki nongïalam jong ka HYC Ri Bhoi Sepngi, haba ki la lap ïa ka jingbymbiang ha ka rukom pyntrei ïa katei ka surok, ki la pynpaw ïa ka jingsngewkhia kaba jur eh, namar kum ka thaiñ, kaba la mad jingeh na ka jingbym biang ki lynti syngkieng, hynrei ynda mynta la ïoh ïa katei ka surok, hynrei kiba pyntrei ïa katei ka surok, kim shym la treibha bad ka ban ai jinghun ïa ki paidbah jong katei ka thaiñ bad kiba pyndonkam ïa katei ka surok.
Hadien katei ka jingjurip ïa katei ka surok bad ba la lap ba ka jingpyntrei kam long shisha kaba biang, na ka liang ka seng ka kyntu ïa u Kontraktor, ba u dei ban trei kham bha bad ha ka jingïakren bad ki nongïalam ka seng, utei u Kontraktor, u la ai ka jingkular ban treibha bad ka ban ai jinghun ïa ki paidbah kiba pyndonkam ïa katei ka surok.
