NONGSTOIÑ:
Ha shwa ban leit sha ka jingjurip ïa ka thaiñ Langpih kawei na ki jaka ïakajia pud bad ka Assam, u Chairman ka Regional Committee na ka bynta ki kam ïapynbeit pud ha West Khasi Hills District, u ba long ruh u Myntri Sorkar u bah Paul Lyngdoh mynta ka sngi u la lum shwa ïa ka jingïalang ha Nongstoiñ ban ïakynduh ïa ki ophisar, ki nongsynshar shnong ka thaiñ Langpih bad kumjuh ïa ki Sengbhalang ka WKHD.
Katei ka jingïalang kaba la lomg ha Trysem Hall jong ka ophis DC ha Nongstoiñ la ïadonlang ruh ki dkhot katei ka Committee kiba kynthup ïa u bah Renikton L Tongkhar MLA, u bah Pynshngaiñ N Syiem MDC, Bajop Pymgrope MDC, ki ophisar sorkar bad kiwei kiwei.
Haba kren sha ki lad pathai khubor hadien bala wai katei ka jingïalang u bah Paul u la ong ba ka jingïalang ka long kaba seisoh bha bad u la ong ruh ba katkum ka jingïoh lum jingtip na katei ka jingïalang ka Committee kala lap ba ki don haduh 52 tylli ki shnong Khasi bad Garo ha ka thaiñ bad 41 tylli ki shnong kidei kiba kwah ban don beit sha Meghalaya katba 9 tylli kiba kwah sha Assam.
Katba na ka liang jong u Bah Renikton L Tongkhar u Chairman barim jong ka Committee u la ong ba ka jingïapynbeit pud ha kane ka wat kaba ar ruh yn shim beit kumba la leh ha ka bynta kaba nyngkong kata ban sngap ïa ka jinglong jaitbynriew bad ïa ka mon jong u paidbah.
Ha kaba ïadei pat bad ki 9 shnong ki bym kwah ban don sha Meghalaya u bah Renik u la ong ba ka Committee kan sa buddien bha ynda kila pynlong ïa ka jingleit jurip lang ha ryngkat ka committee na Assam khnang ban ïoh ïa ka jingtip bad ka daw kaba bniah.
