SHILLONG:
Hadien ka jingshahkynnoh ha u Acting Syiem bad ha ki katto katne ki myntri ba u nongaiktien ka Federation of Khasi States u Bah John F Kharshiing ba um don bynta ei ei bad kane ka seng na ka liang une u rangbah, u la pynshai ba u la shah jied ha kane ka kam la bun bun snem bad u la shah jied biang ha ka 17 tarik u Jylliew, 2019.
Ha ka kyrwoh ba la phah u Bah John u la ong, “Nga la shah jied kum u Spokesperson ka Federation of Khasi States la bun bun snem bad shah jied biang ha ka 17 June 2019 bad haduh kine ki sngi ym shym ïoh kano kano ka jingtip ba don ka jingïalang FKS lane ka shithi ba pyntip ïa ka rai ba la jied da kumwei. Lehse la mih ka FKS thymmai na KHADC kumba la mih teng mynshwa ka FKTI bad kiwei kiwei”.
Ha kaba ïadei bad ka jingkren u Acting Syiem u Bah Ainam Syiem lem bad ki katto katne ki myntri, “Ngam sngewphylla shuh namar da kaba burom ïa ki rangbah hapoh Hima Mylliem la ïa jngan ïa ki jingai jingmut na ka liang jong ngi ki khun ki hajar da ka jingthoh ai jingmut kaba shai sha ka Khasi Hills Autonomous District Council (KHADC).
U la ong, “Kumba long mynta baroh ki nongsynshar ki hap ha ka jingshah thung (appointment) da ka “SANAD” kin hap ban ïada ïalade bad kim lait kren ïa kaba dei ban kren”.
“Ha ka juh ka por ka la don ruh ka jingpynbeit ban jied khnang ïa nga kum u Chairman Khlieh Nongsynshar, da ki khlieh nongsynshar hi (ha kaba na ka liang ka Hima Mylliem kim shym don namar bunsien ki Acting Chief ki rieh ban poi jingïalang FKS) namar ngam dei uba shah teh hat kari ha kata ka (Appointment), “SANAD” bad ka jingjied ïa nga ka long namar nga kloi ban kren ban ïada ïa ka hok ki khun ki hajar bad khamtam ki jingeh jong kiba bun ki hima kiba shah ñion beiñ na ka por sha ka por”, la ong u Bah John
Shuh shuh u la ong, “Ngam sngewpher ïa ka jingkren jingkynthoh jong ki bapli kiba shah teh ha ka “SANAD” bad ki hap ban kren ban pyrshah ïa kitei ki jingai jingmut ki ban wanrah jingshai ha ka synshar khadar ka Hima Mylliem kaba la sah Acting bun bun snem, ki jingkynthoh shimet kim don jingmut kiba kham kongsan ka long ba kin ïa pyrkhat kumno ban lum ïa ka Dorbar Hima ban ïakren ïa kiba bun ki jingeh jong u khun u hajar to ngin ïa lum keiñ ïa ka Dorbar Hima, ngin ïa sei ïa ka nia ka jutang hakhmat u khun u hajar, bad lada nga bakla nga kloi ban weng ïa ki jingai jingmut”.
Lah ban kdew ba ha ka 25 tarik u Kyllalyngkot, 2023 u Bah John u la ïakynduh ïa u Executive Member (EM) ka Khasi Hill Autonomous District Council (KHADC), u Bah Jambor War bad pynsngew ïa u ïa ka jingdonkam ban wanrah ïa ka jingkylla ha kaba ïadei bad ka synshar khadar jong ka Hima Mylliem Syiemship Act- 2007.
“Katkum ka dustur kumba la batai da kiba bun ki syiem tymmen ka Dorbar Hima Mylliem ka dei ban long man ka snem bad kumta ka “Mylliem Act 2007” ruh ka ong dei ban lum Dorbar Hima shisien shi snem kine ki rangbah ba mynta kiba mih thymmai pat ki kwah ban rieh na ka Dorbar Hima da kaba ai daw hana ba dei ban lum tang ha ka saw ka sian. Mano ba ïalam bakla hangne u khun u hajar u long uba shai bad u sngewthuh ïa kine kiei kiei baroh.
“Ngam sngew donkam ban jubab ïa ki jingkynthoh shimet namar ki khun ki hajar hi ki tip ïa ki jingshisha halor ki kam noh synñiang jong nga ha ka imlang sahlang”, la ong u Bah John.
