SHILLONG:
Ki dkhot jong ka Voice of the People Party (VPP), ha ka 12 tarik Jymmang ki la ai ïa ka dorkhas sha u Symbud Myntri Rangbah u Bah Sniawbhalang Dhar, ban dawa ban bishar biang ïa ka Reservation Policy ha ka jylla.
Hashwa kane, haba kren sha ki paidbah ha ka parking lot jong ka Additional Secretariat, u President jong ka VPP u la ong ba ka jingbym don u Myntri Rangbah ka jylla u Conrad K Sangma bad u Symbud Myntri Rangbah ba peit ruh ïa ka tnad Home u Bah Prestone Tynsong, ka dei ka jingñiew beiñ ïa ka seng.
Namar ka jingsngew ba ki shah ñiew beiñ, ka VPP ka la kyntait ban rung sha Main Secretariat bad ka la bthah ïa ki dkhot ka seng, ba la lamkhmat da u Dr Ricky Syngkon, ban leit ai ïa ka dorkhas sha u Symbud Myntri Rangbah ba dei peit ïa ka tnad Urban Affairs u Bah Sniawbhalang Dhar, ha ka jingdon ryngkat u Chief Secretary ka jylla u Bah DP Wahlang.
“Ngi la ïoh jingtip ba u Myntri Rangbah bad u Symbud Myntri Rangbah kim don ha Shillong, ki la leit sha Delhi. Ngam tip ba ki tieng haduh katne ïa ka VPP. Nga la kylli ba ka kam aiu ba donkam eh ba ki hap ban leit shata bad ka i kumba ki leit shato ban pan ïa ka international airport. Ka dei tang ka jingai daw ban lait na ka VPP,” la ong u Bah Ardent.
