MAWKYRWAT:
Ka Khasi Student’s Union (KSU) jong ka South West Khasi Hills District, ha ryngkat ki Seng Samla Shnong bad ki nongïalam Shnong jong ka thaiñ Mawkyrwat, ka dap da ka jingsngewkhia halor ka jingpursted bad ka jingkyn-rei jong u drok hapoh ka thaiñ Mawkyrwat ha kine ki sngi kala jur bha bad kaba la pynjot ym tang ïa shibun ki longïing longsem hynrei ka la buh ruh ha ka jingshong syier ruh ïa ka imlang sahlang bad ïa ka dong ka thaiñ hi baroh kawei.
Khnang ban pynneh ïa ka jingshongsuk shong-shngaiñ ha ka thaiñ Maw-kyrwat bad ka jylla baroh kawei, ka seng ki la leit ban ïakynduh ïa u Bah Paul Lyngdoh, u Myntri ba dei peit ïa ka Social Welfare Department hapoh jong ka sorkar Meghalaya da kaba leit rah ruh ka jingthoh ryngkat ka jingkyrpad kaba ïadei bad u Drok.
Katkum ka jingthoh ba ki la phah ha u Myntri jong ka Sorkar Mehalaya ki la kyrpad ïa ka sorkar ba ka dei ban shimkhia noh mardor bad kham kloi katba da kaba thawlad ban buh noh ïa ki kynja ‘Rehabilitation Centre’ ha South West Khasi Hills District bad halor kane nyngkong nyngshap bad ïa kane la pynshong nongrim halor ka jingkynrei jong u drok hapoh ka thaiñ Mawkyrwat, South West Khasi Hills District, ka Khasi Student’s Union (KSU) lem bad ki nongïalam shnong bad ki Seng Samla Shnong hadien ka jingïatai bad ïapyrkhat halor kane ka mat, ki la rai ban pynsngew sha ki bor sorkar lyngba jong u Myntri ba kin buh noh ïa ka kynja jinghikai ban pyllait jingkyrni lane ka Rehabilitation Centre ha South West Khasi Hills District kyrpang na bynta kine ki samla bad ki briew ba la ngop ha une u jingdih ba pynbuaid.
Katkum ka jinglap jong ki, kiba bun ki samla ba ngop ha u drok ki dei kiba wan na ki longïing longsem kiba duk bad kane ka la ktah shikatdei eh bad ka jingbymlah jong kine ki longïing ban kyrshan ïa ki ban buh ha kiba kum kine ki shlem ka la pynlong ïa kiba kin eh ban bthat na kane ka jingmlien kaba sniew. Kumta, ki la ban jur ïa ka sorkar ba ka dei ban peit bniah lem halor kane ka mat bad ban thaw ruh ki lad ki lynti da kaba buh noh ïa kiba kum kine ki shlem hapoh ka thaiñ. Ha kajuh ka por ban buddien ïa kito kiba la ngat mukotduma ha ki kam ba mih na ka jingkyrni dih drok bad ruh na bynta kito ki ba la thikna ba ki don ïa kane ka ïingkyrni. Kane ka bynta ki kwah ban wanrah sha ki bor sorkar lyngba ban ai jingmut ka long haba ïa dei ba, “Ka jingdonkam ban buh noh ïa ki kyndon ban bud-dien ïa baroh kito kiba la shah kem, ngat mukotduma na ka daw ba ki leh ïa ki kam kiba ka daw ka dei tang na ka jingkyrni dih drok bad kumjuh ruh na bynta kito kiba la thikna ba ki la kyrni ha kane ka jingmlien ba sniew”.
Kawei pat ka long ban thaw bad pyntreikam pura noh ïa ka ‘District Level Committee’ bad ‘Block Level Committee on Drugs Abuse’ ha kaba na ka liang jong ki kim lah ban tip ba kane ka District Level Committee ne ka Block Level Committee on Drugs Abuse ka la treikam haduh katno ha kiwei ki bynta jong ka jylla hynrei kaei kaba ki ïohi ka long ba ka duna ka jingtreikam bad ka jingshimkhia hapoh South West Khasi Hills District.
Shuh shuh na ka bynta ban pyntreikam pura bad ai bor ïa ki bor shnong ban rat dyngkhong ïa u drok da kaba ithuh bad thaw ïa ka ‘Village Level Committee on Drugs Abuse’ ha kaba la sngewdei ban pynsngew bad kyrpad ïa ka sorkar lyngba jong u ïa ka jingdonkam kyrkieh ban ithuh bad thaw katkum ki kyndon ba shong aiñ ïa ka ‘Village Level Committee on Drugs Abuse’ khnang ban aibor ïa ki bor shnong da ka jingïatreilang bad ki bor ka aiñ ban leh ei ei ha ki khep ki khep kum ha ki jingkhynra drok bad kiwei kiwei ki bynta ba ïa dei bad kumno ban rat dyngkhong ïa ka jingkynrei u drok hapoh ki Shnong. Namarkata, halor kane la kyntu ruh ïa ka sorkar ba kan pynbna paidbah katba kum ki kyndon aiñ ïa ki jingbthah kiba shai khnang ba ka jingdon kiba kum kine ki kimiti ha ki shnong ka thaiñ South West Khasi Hills District kan nym long tang ha ki jingthoh hynrei ba ki shnong kin ïoh bor ruh ban leh ïa ki kam.
Namar ka jingbym treikam jong ka tnad ‘Anti Narcotics Task Force’ ha South West Khasi Hills District, ka KSU, ki nongïalam shnong lem bad ki Seng Samla Shnong ki pynpaw ka jingsngewdiaw ban pyntip ba ka tnad Anti Narcotics Task Force jong ka South West Khasi Hills District kaba dei ka tnad jong ka Police Department hapoh ka distrik ka dei kawei na ki tnad bym-lerkam tam na baroh ki tnad sorkar ba don hapoh ka distrik. La pynshai shuh shuh ba kumba long mynta, kane ka tnad ka dang ïoh thiah lyngngai bad ym shym la ïohi shisien ruh ba ka kem drok lait na ki sengbhalang bad ki bor shnong kiba ju ïai long ki nongpeitngor ïa ka jingjur u drok ha ka thaiñ.
