SHILLONG:
Ka Myntri ka tnat ka koit ka khiah ka jylla, ka Kong Ampareen Lyngdoh, ha ka 15 tarik Lber ka la leit jurip ïa ka Civil Hospital Shillong, ryngkat ki ophisar ka tnat.
Ha kane ka jingleit jurip, ka Kong Lyngdoh ka la ïakren ruh bad ki nongpang kiba don ïa ka jingpang bampong (cancer). Ka Kong Lyngdoh ka la ong ba ka jingpang bampong ka dei kawei na ki jingpang kaba shim kham bun ki jingim hapoh ka jylla Meghalaya bad ka la ïathuh ruh ba ka sorkar ka la buh da ka thong ban tehlakam ïa kane ka jingpang.
Ha kawei pat ka liang, ka Kong Anisha Mawlong ba dei ka Head of Department Oncology Department, ka la ïathuh ba la dep pynkhreh ïa ka cancer wing hapoh Civil Hospital Shillong kaba don ruh ïa ka daycare.
Ka la ïathuh ruh ba ka tnat ka trei shitom ym tang ban tehlakam ïa kane ka jingpang hynrei ban lap ruh (detect) ïa kane ka jingpang ha ki bynta ba kham hakhmat (early stage). Ka la pynkynmaw ruh ba la tip ïa ka thaiñ shatei lam mihngi kum ka nongbah jong ka jingpang bampong ha ka Ri lane ka “cancer capital in the country”.
