SHILLONG:
Ka Khasi Students Union (KSU) jong ki lai unit kata ka Mynriang Unit, ka Nonghali Unit bad Diengpasoh Unit ha ryngkat ka jingïatreilang bad ki seng longkmie Diengpasoh bad ka jingsynran lang ki nongkitkam ka KSU Mawryngkneng Circle, ha ka 29 tarik Lber ki la leit hiar ban jurip ïa ka PHC Diengpasoh hadien ba ki paidbah ki la wan ud ba PHC kam biang ha ka jingpyntreikam ïa kane ka jaka sumar.
Na ka liang ki paidbah ki la ud ba kane ka jaka ai jingsumar kam shym la don ïa ki nongtrei kiba biang ha kaba ka duna naduh ki doktor, ki nongtrei, kam don ïa ka kali kit nongpang, wat ka building kam biang ha kaba ki nongpang bad ki nongtrei ki hap ban shong ha kajuh ka kamra.
Ha ka jingleit jurip ka seng, ka la ïoh jingtip katkum ka jingïathuh ki nongtrei kane ka jaka ai jingsumar ba ki nongtrei ki ju pyndonkam da ka kali auto haduh mynta kaba ki shu shim wai bad ka sorkar hi ka siew bai wai ïa kane ka kali.
Kumta ka seng ka la ong, “Ngi pynpaw ka jingsngew lynngoh haba ngi tip ba kat ka PHC kam don ka ambulance bad ka shu wai tang da ka kali shimet”. Kumta ka seng ka la buh jingkylli ba mano ban bah khlieh lada jia eiei ïa kito ki nongpang ba phah kit da kane ka kali khamtam ïa ki longkmie ba armet.
Ka seng ka la kyntu ruh ïa ki doktor bad ki nongtrei ba kin shim khia ïa ka kam bad ka la ong ruh, “Haoid kum ka seng ngim ong ba bym biang ki Nongtrei hynrei ngi kyntu ba dei ban ai jingshakri kaba biang na ka bynta ki jingdonkam ki paidbah.”
Shuh shuh, ka Seng ka kyntu ruh ïa baroh ki paidbah ba lada ki lap ïa kino kino ki jingeh, ki dei ban wan ban ïa kynduh ïa ki bad ka la kular ruh ban ai ïa ka jingïatrei lang bad kane ka PHC khnang ban kyntiew shuh shuh ïa ka.
Ha kawei pat ka liang ka Seng ka la ong ba kam tuklar ïa ka kam jong no jong no ne ban wohdong ïano re ïano ha ka PHC hynrei ka jingleit jurip jong ka ka long ban lap ïa ka jingshisha bad ban sngewthuh ïa ki jingeh ki Nongtrei hapoh kane ka PHC.
Ka Seng ka kyrpad ruh ïa ki bor bahalor bad ïa ka Sorkar bad ruh ïa ki nongmih khmat ban phai khmat ïa ki jingdonkam ka PHC, khnang ban kyntiew ïa ka jingai jingshakri jong ka.
