NONGPOH:
Hadien ka jingbym lah shah shuh ban ïai ap ïaka jingpynlait pisa naka ka sorkar naka bynta ka Covid Duty bad ka Election MLA Duty sha ki Draibar Kali Kamai bad ki Trai Kali, mynta ka sngi Ka Joint Action Committee jong ka All Ribhoi Passenger’s Vehicle ka ba dei ka kynhun ïasynrop lang jong ki nongñiah kali kamai naduh ki Sumo, Taxi, Pickup bad Ki Bus ha ka 16 tarik Jymmang ki laleit ban ïakynduh ïa u Deputy Commissioner jong ka Ribhoi u Arpit Uphadhyaya ban ïakren halor ka jingeh jong ki Draibar.
Haba kren sha ki lad pathai khubor u Bah Vincent Sohkhwai Secretary la JAC u la ïathuh ba ka daw kaba pynlong ïaki ban leit ïa kynduh ïa u Arpit Upadhyaya u Deputy Commissioner ka Ribhoi ka long ban ïakren halor ka jingbat Jong ka Ophis u DC ïaki kali kamai naduh ka Duty Covid-19, Ka Duty Election MLA ka ba dang shudep bad kiwei kiwei bad ïa ka pisa naka liang ka Department kim shem la pynlait satia haduh mynta bad kane ka jing pynsahkut ïaka pisa kaba dei ban pynlait sha ki nongñiah kali lane ki Trai Kali Kamai bad kane ka jingpynslem ban pynlait ïaka pisa ka la pyndiaw mynsiem ïaki babun bad ka la ktah shisha ïaka ïoh ka kot Jong ki Draibar kali.
U la ïathuh ruh ka jingbat ïaki kali kamai ka la long naduh ka por Covid-19 naka bynta ban beh ïaki Duty bad ïaka pisa kaba dei ban pynlait sha ki trai lane ki Draibar haduh mynta kim shem la pynlait satia. Shuh shuh u la ruh ba ha kane ka election jied MLA kaba dang shudep naka liang ka tnad Election ka la bat ihaduh 400 tam ki kali ki ban beh naka bynta ka Election Duty bad ïa kane ka pisa kaba la dei ban pynlait sha ki trai lane ki Draibar haduh mynta kim shem la ïoh satia. Katkum ki jingthoh bala pynpaw haka dorkhas ba phah sha u DC la pynpaw ba Naka liang ka JAC ka kynhun Jong ki Nongñiah kali kamai haka jingïalang ba la dep long haka 16 tarik Jymmang ki la shim ïa kawei ka rai ba kin sangeh ban ai ka jingïatrei lang bad ka Sorkar ha kino kino ki khep ba ka sorkar ka donkam ba lada naka liang ka ophis u DC kin pynslem ban shim khia ïa kane ka kam.
U Bah Vincent u la ïathuh, hadien ba ki la ïoh ban ïakren bad u DC ban pynpaw ïaka jingeh Jong ki Draibar kali, naka liang u Deputy Commissioner u la kular ba hapoh 15 lane 20 sngi un pyndep noh ïaka jingpynlait ïaka pisa Jong ka Election Duty shaki trai ba dei ban ïohïoh bad haka ba ïadei bad ka pisa naka bynta ka Covid Duty u la ong ba un sa dang bundien.
