SHILLONG:
Hapoh ka jingïalam jong ka Northeast Students Organization (NESO), la pynlong ïa ka jingïalang hapdeng ka Khasi Students’ Union (KSU) bad ka All Assam Students Union (AASU) ha Tripura, ha kaba ïadei bad ka jingshah siat ki san ngut ki rangbah Khasi bad uwei u nongtrei ka tnad Forest jong ka sorkar Assam, ha ka shnong Mukroh West Jaiñtia Hills District, ha ka 22 tarik, Naiwieng, 2022.
Ha kane ka jingïalang, kine ki ar tylli ki seng ki la kyntu ïa ki paidbah jong ka jylla Assam bad ka Meghalaya ba kim dei ban ïakhihwin bad ki la ong ba kane ka jingjia kam dei kaba mih na ka jingïashun hapdeng ki jaitbynriew jong kine ki artylli ki jylla, ‘hynrei ka dei ka jingeh kaba lah slem kaba ïadei beit bad ka jingïakajia khappud hapdeng jong kine ki artylli ki jylla. Kine ki ar seng ki la ong ba ka sorkar Assam bad ka sorkar Meghalaya, ki dei ban kitkhlieh bad ban pynbeit kloi ïa kane ka jingïakajia khappud’.
Kine ki ar tylli ki seng ki la dawa ruh na ka sorkar Assam bad ka sorkar Meghalaya ba ki dei ban ai jingïada ïa ki shnong kiba don ha ki khappud jong ka Assam bad ka Meghalaya. Ki la ong ba watla kine ki sorkar jong kine ki ar tylli ki jylla ki dang don hapdeng ka jingïakren khappud, ‘hynrei ki dei ban pynthikna ba ki shnong kiba don ha ki khappud ki dei ban long shngaiñ.
“Kine ki artylli ki sorkar jylla ki dei ban peit ïa ka mat kaba kongsan bad kata ka long ka jingshngaiñ jong ki nongshong shnong ha kine ki ar tylli ki jylla khamtam ha kine ki por ba ïakajia; ka la don ka jingshongsyier jong ki nong Assam kiba don ha nongbah Shillong bad ki Khasi kiba don ha ka nongbah Guwahati Assam,” la ong ka kyrwoh jong kine ki seng.
Ki dkhot jong kine ki artylli ki seng kiba ïadonlang ha kane ka jingïalang ki long u AASU President Dipanka Kr. Nath, u President ka KSU u Bah Lambokstarwell Marngar, u Chairman ka NESO u Bah Samuel B. Jyrwa, u Sankor Jyoti Baruah bad u Sinam Prakash Singh.
