NONGPOH:
Ha ka jingïakynduh hapdeng ki nongïalam ka Regional Committee lem bad ki khlieh nongsynshar Hima, Raid bad shnong, na ka bynta ban ïakren halor ka jingïakynduh pud jong ka wat ba-ar, kaba la long mynta ka sngi ha Nongpoh, ki la ïoh ban ïakren shwa tang ïa artylli ki jaka ïaknieh pud hapdeng ka Meghalaya bad Assam, kata kawei ka dei ha ka thaiñ Raid Nongtung (Block-2) kaba hap ha Hima Khyrim bad kawei pat ka dei ha ka thaiñ Sunapur bad ha ka jingïakren ka dei kaba la tip kum ka Desh Demoreah kaba hap ha ka Hima Mylliem.
Ha katei ka jingïalang kaba la pynlong ha Conference Hall ha ophis DC, ha kaba ka jingïakren ka Regional Committee ban pynbeit ïa ki kam pud kam sam haka thaiñ Ri-Bhoi, ka dei beit tang ka jingpynbeit ban pud tang ha kitei ki ar jaka, kata na ki 4 tylli ki jaka kajia pud ha Ri-Bhoi, namar ïa kitei ki artylli kiba dang sah yn sa ïakren pat hadien.
Ïa katei ka jingïalang, la khlieh da u Bah Prestone Tynsong, Chairman ka Regional Committee ha ka jingïakren ban pynbeit ïa u pud u sam hapdeng ka jylla Assam bad Meghalaya, ryngkat ka jingdon ki nongmihkhmat na Ri-Bhoi, kiba kynthup ïa u naduh u Bah Sosthenes Sohtun MLA Jirang, uba dei ruh u dkhot ka Regional Committee, u Bah Mayralborn Syiem, MLA Nongpoh, u Bah Dasakhiatbha Lamare MLA Mawhati, U Arpit Upadhay Deputy Commissioner ka Ri-Bhoi, u ba long ruh u Member Secretary jong ka Committee, ki nongsynshar Hima bad nongsynshar shnong naduh ki Syiem, ki Myntri jong ki Hima bad ki raid bapher bapher lem bad kiwei.
Hadien ba la kut katei ka jingïalang, u Bah Prestone Tyngson, u la ong ba ha katei ka jingïalang, la ïoh ban ïaphylliew jingmut halor shibun ki kam, khamtam eh ban ïakren bad ki nongïalam Hima, Raid bad Shnong, ba kin wan pyni ïa ki kot ki sla, na ka bynta ban pynshisha halor ka jinglongtrai ïa ki jaka ki puta ha kitei ki jaka ba don ka jingïaknieh pud hapdeng ka Meghalaya bad Assam.
U la ong ruh, ba katei ka jingïalang, ka la shim ïa ka rai ba kumba ka long mynta, ka Komiti ka pdiang sngewbha ïa ki Dorbar Shnong bad ki Hima, ba ki lah ban wanrah shuh shuh ïa ki kot ki sla ne ki dulir jaka, khnang ba kin long kum ki sakhi kiba khlaiñ ha ka jingïakren pynbeit pud hapdeng ki Regional Committee jong ka jylla Assam bad Meghalaya.
Kumba ka long mynta ka Regional Committee, ka dang ailad ïa ki nongïalam shnong, Hima bad Raid, ba lada ki dang don ïa kino kino ba ki kwah ban pynsngew biang sha ka Committee, ïa mynta hi ka dang pdiang bad lada donkam yn sa ïakren biang, hashwa ba ki Regional Committee jong ka Meghlaya bad Assam kin shong ban pynbeit ïa kito ki jaka ba thmu pynbeit pud.
