SHILLONG:
U Symbud Myntri Rangbah ka Jylla, uba dei ruh ban peit ïa ka tnat PWD jong ka Sorkar jylla myn ha ka 11 tarik Nohprah, 2023 u la lum ka jingïalang na ka bynta ban wad ka lad ka lynti ban shna ïa ki surok na Nongbah Shillong bad na New Shillong Township (NST) ki ban pynïasoh bad ki surok bah, kum shi bynta ban pynduna ïa ka jingdheng kali ha Nongbah Shillong.
Haba kren sha ki lad pathai khubor u Bah Tynsong u la ong, ” nga la khot ïa ka jingïalang ha kaba ïadei bad ka jingwad ïa ki lad ki lynti ban shna ïa ki surok na Nongbah Shillong bad ha New Shillong Township bad pynïasoh bad ki surok bah”.
U la ong “nga la lum ka jingïalang bad ki ophisar ka Central Division PWD, ka Bypass Division PWD ka National Highway Division ha ka jingïadon ryngkat ki ophisar ka tnad Revenue bad ka tnad Forest, ki Deputy Commissioner”.
U la bynrap, “kane ka jingïalang ka long ban ïa kren ban pyrshang ban wad ïa ki lad ki lynti ban shna da ki surok ki ban lah ban pynduna ïa ka jingdheng kali”.
U Myntri u la ïathuh ba ka sorkar ka pyrshang ban wad ïa ki surok ban lah ban pynïasoh sha ki surok bah la kan dei sha Shillong Bypass Lane ïa ka Shillong Jowai National Highway – ngin pyrshang ban pynïasoh bad ki surok ha Shillong bad ha NST.
U la pyntip ruh ba na ka bynta kane ka jingthmu ban pynurlong ïa kane ka Project na ka liang ka sorkar kan pan ka jingïarap na ka sorkar kmie. U la bynrap ba kine ki surok kin ym dei ki Four Lane hynrei ngi don ka jingthmu ban don ki surok ban pynduna ïa ka jingdheng kali ha Shillong.
