SHILLONG:
U nongïalam ka Voice of People Party (VPP), u Bah Ardent Miller Basaiawmoit, u la ther tyngeh ïa u MLA ka Umsning konstitwensi, u Dr Celestine Lyngdoh halor ka jingkynthoh jong u ïa ka reservation policy, da kaba kdew ba lada kynthoh kiwei kiwei ki MLA ki bym dei kiba don ka jingnang jingstad ba shalor, un ym da don jingsngew than hynrei ka jingkynthoh na u MLA ka Umsning ka la pynshaïong ïa u .
Ka seng VPP ka la pynlong ïa ka jingïalang paidbah ha Umsning, ha ka 17 tarik Jylliew ha kaba u Bah Ardent Miller Basaiawmoit u la pynpaw ba u dap da ka jinglyngngoh haba u la ïohi ïa ka jingkynthoh na u MLA ka Umsning Konstitwensi.
Haba kren ha kane ka sngi, u Bah Ardent u la ong, “Nga khlem wan hangne ban ther ïa u MLA ka Umsning, hynrei nga wan tang ban pyn-i nia,nga la burom shisha ïa u MLA ka Umsning namar haka por ba don dorbar ngi la ïa ñiom lang beit ïa ka sorkar”, u la ong.
U la bynrap ruh da kaba ong ,“Hynrei ha ka jingïalang paidbah, nga da shaïong ban sngap ïa ka jingkren jong u namar lada kren kiwei ki MLA ki ba dang kham duna, ngam da kwah ban pynsngew, hynrei u kren u MLA ka Umsning u ba nga da burom bad nga lyngngoh ïa ka jingbuh jingkylli jong u halor ka jingkwah ka VPP bad baka VPP ka khlem pynpaw ba ka kwah aïu”.
U Bah Ardent u la ong shuh shuh, “Lada ong bym don khmat, don shkor, la sngew ïahap kumno um ïohi ym tip ïa kaei kaba ngi kwah? Ngi baroh ngi tip ba ka Reservation policy ka dei ka daw, ka dei ka jingeh kumta donkam ban pynbeit thymmai ïa ka bhah thungkam”.
“Kumno kin pynbeit thymmai, ngi la ai jingmut sha ka sorkar ban thaw da ka Expert Committee bad ngi la kdew lynti ba la kumno kumno ka dei ban long kat kum ka jingdon paid ngim kwah ban ïa kren ïa kiwei pat ki jaitbynriew hynrei ngi kwah ban kren ïa kane ka 80%, ka hok jong ngi ki Khasi bad jong ki Garo”.
