SHILLONG:
U President jong ka Khun Hynñiewtrep National Awakening Movement (KHNAM) State Youth Wing, u Bah Thomas Passah u la pynrem jur ïa ka jingkren jong u Chief Executive Member (CEM) jong ka KAAC. Ha ka kyrwoh ba u phah sha ki lad pathai khubor, u Bah Passah u la ong, “ka jingkren jong CEM jong ka ‘Karbi Anglong Autonomous Council’ (KAAC), ba u ong ba ki khasi ki dei ki poiei, ka dei ka jingkren tohmed bad ka dei ka jingkren kaba khlem nongrim bad khlem don jingtip.”
Ka KHNAM ka la ong ba katkum ka jingthoh bad jingwad bniah jong uwei u nongthoh kot ba pawnam bha jong ka Assam, u Dr. S. K. Bhuyan, “u la batai ba ki Karbi katkum ka pateng (Racially), ki dei na ka kynhun “Mongoloid” bad katkum ka ktien kaba ki kren (linguistically), ki dei na ka kynhun ‘Tibeto-Burman’. Ka shnong tynrai jong kine ki briew kiba kren Tibeto-Burman ka dei na Western China bad nangne pat ki rung sha India bad Burma.”
Ka KHNAM ka la pynshai da kaba ong ba katkum ka jingbatai jong ki kot thoh; ‘ki Karbi ki rung sha Assam na Central Asia ha ka jingphetwir kaba jur bha ha kito ki por. Nangta pat ha ki por kham mynshuwa bha, ki Karbi ki sah ha ki rud jong wah Kalang bad Kapili bad ha shilynter jong ka Kaziranga, hynrei ha ka jingsynshar jong ki Syiem Kachari ki la shah beh sha jrong ki lum bad kato katne na ki, ki la rung sha rilum Jaiñtia bad ki Syiem Jaiñtia ki la ai jaka sah ïa ki bad ki la im ha ka jingsynshar jong ki Syiem Jaiñtia’.
Ka KHNAM ka la ong ba katkum ka jingbatai jong kine ki kot thoh, ‘ki Karbi ha ka jingshisha ki dei kita ki phetwir lane kita ki ‘illegal settler’ ha u pud u sam jong ki Khasi Jaiñtia’.
“Ka jingkren jong u CEM ka KAAC ka pynpaw ïa ka jingtlot jong u CEM ka Jaiñtia Hills Autonomous District Council (JHADC) bad ka sorkar jylla, kiba la ailad lane pynshlur ïa u poiei ban kynnoh poiei ïa u Khasi, u trai khyndew, u trai jaka. Kane ka jingkren khamtam ha kum ha kane ka por ka wan ïalam shibun ki jingkulmar bad ka pyndiaw ïa ngi kum ka jaitbynriew,” la bynrap ka KHNAM.
“Ka sorkar jylla ka dei ban pynpaw sha ka sorkar Assam ba ki Karbi kim dei ban shna ïa uta u mot jong u ‘forest guard’ uba la ïap ha ki kuli jong ki pulit Assam hi. Kane ka jingthmu ban shna ïa une u mot ha Mukroh, kan pynklang shuh shuh ïa ka ding,” la ong u Bah Passah.
U la ong ba ka jingkren jong u myntri rangbah jong ka sorkar jylla, u Conrad Sangma ha kaba ïadei bad ka jingpynsangeh shuwa ïa ka jingïapynbeit pud namar ka jingjia ha Mukroh, ‘ka long kaba phylla’.
“Ngi la khmih lynti ba ka sorkar kan pei phang na ka jingjia ha Mukroh bad ban pyrkhat kumno ban pynbeit noh mardor ïa u pud u sam namar ka tynrai jong kane ka jingjia ha Mukroh ka dei hi namar ka jingbymshai u pud u sam. Ka sorkar Meghalaya lyngba ka sorkar Assam ka dei ban bthah ïa kine ki nongïalam Karbi ba kim dei ban pynshit ïa u paidbah uba la bitar. Ngi kwah ba kan don ka jingïashongsuk shongsaiñ ha ki thaiñ khappud jong ngi,” la bynrap shuh shuh u Bah Passah, nongïalam ka KHNAM.
