SHILLONG:
Ka seng Hynñiewtrep Integrated Territorial Organization (HITO) mynta ka sngi ka 14 tarik Risaw 2022 ka la pynlong ïaka jingïaid paidbah kaba la sdang napoh u mot Kiang Nangbah hajan Civil hospital bad ki la leit ruh ban buh ïaki syntiew ha khmat ka Secretariat.
Ka jingthmu jong ka seng HITO ban leit buh syntiew ka long beit ban kyrsiew thiah bad pynrem ïaka sorkar jylla halor ka jinglong kuman jong ka ha kaba ïa dei ban suspon ïaki pulit kiba don kti haka ban kawang lyer pynsat khmat ïaki nonghikai bad khlem pyrkhat shuh ïaka jingdon lang jong ki khunlung ki khynnah.
Haba ai jingkren halor ka jingleit buh syntiew jong ka seng HITO mynta ka sngi u president ba rangbah ka Seng u samla Donbok Dkhar u la ong ka khubor kaba shai lada kane ka sorkar MDA ka dangïai pyn tyrha shi tyrha ïaka jaitbynriew ka jong ngi ne ban shah shiliang ïa ka aiñ, te kynmaw baka HITO hi kan ai daka AK47 ïa uwei pa uwei u dkhot jong ka HITO.
Shuh shuh u la ong ruh ba lada ka sorkar ka leh shi leh, ngim banse tang ban im ka ri bad ka jaitbynriew, ngin theh da ka snam haban da peit khmat, khnang ba kane ka sorkar ksuid kan tipshai hi ba u shynrang u im man ka sngi bad u ïap tang shisien.
