NONGSTOIÑ:
Ka Dorbar shnong jong kawei ka shnong ha WKHD ha ryngkat ka jingïatreilang bad ka tnad pulit, ka ophis jong u District Child Protection Officer (DCPO) Nongstoiñ lem bad ka North East Network, mynta ka sngi ka 14 tarik Jylliew kila pynlong ïa ka jingïaid paidbah ban pynrem ïa ka jingjia shah thombor ki heprit ha u wei u runar kaba la jia ha kine ki bnai bala dep.
Ha kane ka jingïaid paidbah, la wan ban ïashim bynta naduh ki longkmie longkpa, ki khun samla jong ka shnong, ki khynnah skul ha ryngkat ki jingthoh pynrem ha ki placard ïa u nongthombor bad ki jingpyrta ban dawa pynïoh ïa ka hok ïa ki lanot kiba la shah leh bor ha u runar.
Hadien ka jingïaid paidbah, la don pat sa ka jingïalang ban ai jingpynshai sha ki paidbah nongshong shnong jong katei ka shnong halor ki kam thombor ïa ki riew kynthei, khynnah bad ruh halor ki kyndon aiñ jong ka Protection of Children from Sexual Offenses (POCSO) Act.
Na ka liang jong ka kong Phidarilin Uriah na ka North East Network Shillong haba ai jingkren ha katei ka jingïalang, kala kyntu ïa ki kmie ki kpa ba kin pyllait por ban ïakren ban sngewthuh ïa la ki jong ki khun ki kti ban tip ba kidon aïu ha ka jingmut jingpyrkhat namar naduh dang kha haduh ynda la dap 8 snem kidei ki snem ba kongsan tam ha ka jingim ki khynnah bad kumta dei ha kine ki snem ba ki kmie ki kpa bad ki nonghikai kin ai ïa ki jinghïakai kiba bha tam.
Shuh shuh kala ong ruh ba ha kane ka juk kaba mynta khamtam ha ka juk ki kor ki bor internet bad teknology , bun ki khynnah ki sngewtynnad ban peit ïa ki mobile phone hynrei ki kmie ki kpa kidei ban peithuh pat aïu ki khun ki leh bad pyndonkam ïa ki mobile lyngba ki kor internet.
Katba na ka liang jong u Bah W. Shabong na ka DCPO u la ong ba ym dei tang ban shu ap haduh ynda ki pulit kin leh ïa ka kam lane ki tnad sorkar kin leh ïa ka kam hynrei donkam ka jingïatreilang bad u la kyntu ruh ïa ki khynnah ba kim dei ban shu shaniah kulmar ïano ïano namar bunsien ki jingjia shah thombor kadei beit ba u nongthombor hi barabor u dei u ba ithuh ithaw.
