SHILLONG:
Ki dkhot jong ka Khasi Students’ Union (KSU), ha ka 6 tarik Kyllalyngkot ki la leit ban ïakynduh ïa u Myntri ka tnat ïalehkai ha ka jylla u Bah Banteidor Lyngdoh, ban dawa halor ka jingshna ïa u mot dur ba shirynïeng jong u Tirot Sing habar ka ophis treikam jong ka tnat.
Haba kren bad ki lad pathai khubor u General Secretary ka KSU u Bah Donald V Thabah, u la ïathuh ba na ka liang jong ka seng ki la ïoh ïa ka jingtip ba ka tnat ïalehkai kan maramot noh ïa ka Tirot Sing Indoor Statdium. Ka seng ka sngewkhia namar ba u don u mot dur jong u Syiem Tirot Sing u ba la tei da ka KSU Jaïaw circle ha u snem 2003, bad ka seng ka la ïoh jingtip ba ka tnat ka la weng noh ïa une u mot.
Ka seng ka la wad ka lad ka lynti namar ba la suit la shor ïa u mot bad ka kwah ba un neh bad ha ka jingïakynduh bad u Myntri ka tnat ïalehkai jong ka sorkar jylla, u la kular ban tei noh da u mot ba shirynïeng jong u Tirot Sing ha kane ka jaka.
“Ha khmat jong ngi hi u la phone ïa u Chief Engineer ban pynlait jaka noh ban ym buh shuh ïa u mot hapoh stadium hynrei kin shna noh habar jong ka ophis da u mot ba shirynïeng jong u Tirot Sing,” u la ong.
Ka seng ka la kyrpad ruh ïa u Myntri ka tnat ban pyndep ïa kane ka kam ha shwa ka sngi kynmaw ïa ka jingkhlad u Tirot Sing, kata ha ka 17 tarik Naitung ban ïoh ban kynmaw burom ïa ka sngi ïap une u riew khraw.
Haba ïakren bad u Myntri ka tnat ïalehkai jong ka sorkar jylla u Bah Banteidor Lyngdoh u la ong ba kum ba phi la ïohi ïa ka Tirot Sing Indoor Stadium la dep ban pynpra ban ïoh ban shna noh da kaba thymmai.
“Ïa ka jinglut yn bei da ka tnat ïalehkai, bad ka jingsdang ban tei ïa une u mot kan long lang bad ka jingshna ryngkat ryngkat bad ka building bad ka tnat kan ïaleh ban pyndep ha ka por ba kloi,” u la bynrap.
