SHILLONG :
Ka Khasi Students’ Union (KSU) Laban Circle ha ka jingkynduh bad u Bah Sanbor Shullai uba long u MLA ka South Shillong Constituency bad kumjuh ruh u Myntri sorkar jong ka tnat Animal Husbandry and Veterinary, Arts & Culture ha ka 16 tarik u Naiwieng, 2022 ki la ïakren bad ïamir jingmut halor kiba bun ki mat jingdonkam ba ïadei bad ka thaiñ Laban bad ha katei ka sngi la donlang ruh u Bah Ricky Shullai uba long u MDC barim ka Laban Konstiteunsi.
Kawei na ki mat ba ki la ïakren ka dei halor ki artylli ki surok kiba ka Naming Committee jong ka Sorkar Jylla ka la pynkylla kyrteng sha “Ardhendhu Choudhary Road” ha u snem 2020 kaba don ha Dorbar Shnong Laban bad “Bhaskar Choudhary Road” ha u snem 2022 kaba don ha Dorbar Shnong Laban, ha kaba ïadei bad kine ki jingai kyrteng ïa kitei ki surok ka Seng ka la pynpaw ba naduh nyngkong ka la ïeng rangbah ba kam sngew ïahap satia ban ai nam ïa ki surok sha kiwei pat ki jaitbynriew bad ka la pynlong ïa ki jingiakhih ha ryngkat bad ki Dorbar Shnong bad ka la phah bun tylli ki dorkhas sha ki tnad ba dei peit halor ka kane ka bynta.
Ha kaba khatduh hadien ki jingïasyllok na ka por sha ka por bad ha ka jingkynduh ha katei ka sngi na ka liang u Bah Sanbor Shullai u la mynjur ban weng noh ïa kine ki kyrteng jong kine ki surok ba ainam sha ki jaitbynriew bym dei riewlum.
Kiwei de ki mat ba ki la ïakren bad u MLA ka thaiñ ha katei ka sngi ki kynthup halor ka mat ka jingwan rung beaiñ ki mynder hapoh kane ka thaiñ bad ki lad lynti kumno ban teh lakam bad ban trei ryngkat bad ki tnad pulit bad ki nongïalam shnong bad halor ka jingdonkam ban buh ïa ka Rehabilitation Centre bad ban don ki Councellor ki ba biang ban lah ban ai jinghikai ïa ki samla ba la ngat ha une u jingdih ba kin lah ban lait bad wanphai biang sha ka jingim kaba thikna.
Halor kane ka khubor ka seng ka la pynpaw ka jingsngewkmen namar ka jingkwah jong u paidbah bad ki nongshong shnong ka la urlong halor kane ka bynta bad kum ka Seng ka nym shongthait namar dang don ki jaka ba dang sah ha ki ktien nongwei bad kan sa shim ïa ka sienjam ban trei ryngkat bad ki bor shnong ban pynkylla ïa kum kita.
