SHILLONG:
Hadien baka Kong Phidalia Toi ka la shah weng noh kum ka chairperson jong ka Meghalaya State Commission for Women (MSCW), ha kane ka kynti ka Kong Phidalia ka la ong ba mynta kan don ka jingïakhun pyrshah ïa u Myntri ka tnad Social Welfare, u Bah Paul Lyngdoh.
“Mynta ka la dei ka jingïakhun”, la kren da ka Kong Toi ha ka 23 tarik Jylliew katba ka dang jubab halor ki jingkylli ban pyn-i ïa ka daw (show cause notice) kaba la ai da ka tnad Social Welfare.
Ka jubab jong ka Kong Toi, ka pyn-i ba ka jingïadei hapdeng jong ka bad u Myntri ka tnad Social Welfare, u Bah Paul Lyngdoh ka long ka bym sngewtynnad na ka daw ka jingshah weng ïa ka kum ka chairperson jong MSCW.
Na ka liang ka Kong Toi kan sa phah ïa ka jubab jong ka halor ka show-cause notice bad ka la kam ruh ba la phah ïa ka jingpyntip sha ka hadien ba u myntri u la dep ai jingkren arsien hakhmat ki lad pathai khubor.
Shuh shuh, ka Kong Toi ka la ong ba ka la ïoh jingtip shaphang ka jingshah weng jong ka na ka shuki lyngba ki lad pathai-khubor.
Khyndiat sngi mynshwa, na ka liang u Myntri ka tnad Social Welfare u la kam ba la shim ïa ka rai ban weng ïa ka Kong Phidalia Toi kum ka chairperson ka MSCW kam long halor ka nongrim jong ka khubor hamsaïa hynrei ka dei ynda la dep ban bishar bniah katkum ki kot ki sla ba donkam.
