SHILLONG:
Ka nongbah Shillong mynta ka sngi Thohdieng, ka la don hapdeng ka jinglyngngoh hadien ba ka jingïaid paidbah kaba jai jai kaba la khot ka Federation of Khasi Jaiñtia and Garo People (FKJGP) kyndit kynsan ka la kylla sha ka jingshoh briew.
Mynta ka sngi na ka liang ka FKJGP, sengkmie ka la khot pynlong ïa ka jingïaid paidbah kaba la sdang na ka Motphran bad thmu ban pynkut ha madan Ïewrynghep, Laitumkhrah, kiba la wan ban shim bynta ki san seng kiba kynthup ïa ka FKJGP, ka RBYF, HNYF,KSU bad JSU.
Ïa ka rally la pynlong na Motphran ter ter shaduh madan Ïewrynghep, ha kaba la sakhi ruh ïa ka jingjar jar ki ïew ki hat na ki thaiñ GS Road ter ter shaduh Khynadailad na ka jingkhang khyrdep ïa ki dukan jong ki bar jylla mar sien sdang kane ka jingïaid paidbah.
Katba ka jingïaid paidbah ka la ïaid shakhmat, ka la don ruh ka jingshim kabu jong ki katto katne ngut ki nongshimkabu ki bala pynpait ïa ki ïit kali bad thombor ruh ïa ki nongleit nongwan shilynter ka jaka ka ba ki ïaid da ka ba shoh naphang katba ïoh, kynthup ïa uwei na ki nongthoh khubor na ka shlem khubor Mawphor uba la shah shoh sha tied namar ba u la ring video ïa ki.
Na ka liang jong u Superintendent of Police, u bah S.Nongtnger u la phah ïa ka kyrwoh halor kane ka jingjia bad ïathuh ba ki pulit ki la dep ban register ïa ki ar tylli ki Suo moto Case, halor kane ka jingjia kawei ha Laitumkhrah Police station bad kawei ha Sadar Police Station.
Na ka liang u President ka FKJGP u bah Dundee Khongsit kham hadien haba kren haka jingïalang, u la panmab ïa ka jingshah shoh ki nongthoh khubor ha ka jingïaid rally.
Ha kajuh ka por, u President rangbah ka FKJGP u la ong ba kane ka dei ka sngi ba la lum ïalang ïa ki khun samla, na ka bri u hynniewtrep ban ïakren halor ka jingeh ki khun samla ha ka ïoh kam ïoh jam.
U la ong ruh ba ka seng da ka mynsiem ba sngew khia ka la shim ïa ka sienjam ka ban tynrong lang ïa ki jingeh kiba kum ki khun samla ki ïa kynduh bad ïa ka lyngkor ka ba ki ïa kynduh ,ka jingkyrduh kam duh jam kam dei shuh ka jingeh jong ki longing long sem hynrei ka dei ka jingeh jong ki jaitbynriew.
“Mynta kam pat dei ka por ban pyni bor sha ka sorkar hynrei lada ka sorkar kan dang sngap mynthi ngi long ki ba kloi ban pynpaw ïa kata, kane kan dei tang ka jingsdang bad lada donkam ban pynlyngkien ïa ka snam ha lynti syngkien ngi long ki ba kloi na ka bynat ki khun samla jong ngi”, u la ong.
U la ong ba ka rally ka dawa mardor ba ka dei ban pyndap noh ïa ki kam kiba thylli, ha ki tnad sorkar bapher pher namar kum ba ka long haduh 7653 tylli katkum ka RTI. Kaba sngewsih ka long ba u Myntri Rangbah u la len ïa kane hapoh ka ïing dorbar da ka ba kam ba tang 3000 tylli ki kam ki lait kane ka dei tang ka jingñiewpoh jong ka sorkar ïa ki khun samla, kiba wad ïa ki kam ki jam.
Ka seng ka dawa na ka sorkar ban pyntreikam noh ïa ka State Employment Policy, ban long kaba shai bad ka State Employment Policy ka lah ban thep ka kyndon halor baroh ki kam ki jylla.
