SHILLONG:
Ka Umsning Area Headman Forum ka la pynrem jur ïa ka jinglehsting ka National Highway Authority of India ha kaba maramot ïa ka surok ha Umtrew, Ri Bhoi District, kaba la poi shaduh u pud ban ïatyngkhuh kali ha ka Sngi Saitjaiñ.
U Bah Frankie Nongrum, Convener ka Umsning Area Headman Forum u la ïathuh ha ka por ba maramot ïa kane ka surok ki duna palat ki jingpyni dak ba dang maramot ïa ka surok bad dei ban ïaid tang na shiliang ka bym maramot.
U la ïathuh ruh ba ka jingduna ki jingpyni dak ka la wanrah ïa jingjia ba sngewsih, haba kala mih ka jingtyngkhuh kali ha ka Sngi Saitjain ha Umtrew. Kumta ka Forum ka la dawa bailutksan na ka bynta ki kali kiba la tyngkhuh bad ïa kiba mynsaw. Ka kyntu ruh ba dei ban buh nongtrei ha manla ki dong ryngkat ki jingpyni dak ban ïaid beit ha la ka jong ka liang khnang ban lait na ki jingjia ba sngewsih.
