SHILLONG:
Ka Meghalaya Energy Corporation Limited (MeECL) ka dangap ban ïoh ïa ka jingbit ha kaba ïadei bad ka jingktah ïa ka mariang na ka bynta ban pyntrikam noh ïa ka bynta kaba ar jong ka Myntdu-Leshka Hydro Electric Project (MLHEP-II).
Ka MeECL kan sa pyntreikam ïa ka Myntdu Leshka Hydro Power Project-State II ha ka wah Myntdu kaba 210 MW.
“Ïa ka jingpynsngew paidbah la dep pynlong bad mynta dangap ïa ka jingbit kaba ïadei bad ka jingktah ïa ka mariang na ka bynta ban pyntreikam. Ngin ïaid shakhmat hadien ba la ïoh jingbit”, ong u Myntri ka tnad bording jong ka sorkar Meghalaya u Abu Taher Mondal.
Ka jingtei ïa kane ka projek ka lah ban sdang ha u snem 2023 bad la khmih lynti ban sdang lah pyntreikam noh naduh u snem 2027. La khmih lynti ba kane ka projek kan shongdor kumba $423.178m.
U Mondal u la ïathuh shuh shuh ba ka la don ka jingtywra ban shna ïa kawei pat ka projek pynmih bording ha ka wah Umiam.
Hynrei u la ong ki don katto katne ngut ki briew ha ka thaiñ kiba pynpaw ïa ka jingbym sngewtynnad ïa ka jingtyrwa. “Nga la ïakren bad u MLA ka thaiñ. Ngin sa ïakynduh biang ban pynbeit ïa kane”, la bynrap u Mondal.
