SHILLONG:
U MLA ka Congress na Gambegre uba dei ruh u dkhot ka Public Accounts Committee (PAC), u Saleng Sangma, ha ka 13 tarik Jylliew u la ong ba ka PAC ka la ai ïa ka show cause notice sha ki principal secretary jong ki tnad bapher bapher jong ka sorkar kiba la ai ïa ka kaiphod halor ka jingduhnong ha kaba ïadei bad ka jingmih (revenue loss).
U Sangma u la ïathuh ruh ba la pynlong ïa ka jingïalang ban ïatai halor ki sienjam kiban ïarap ban pynbha ïa kine ki tnad bad pynlong ïa ki kiba ïohnong. “Ngi la pynlong ka jingïalang bad ki ophisar jong ki tnad revenue, registration & taxation, transport, forest & environment, bad mining, namar ki don katto katne ki bynta kiba ngi duhnong ha kaba ïadei bad ka jingmih ha ka jylla, bad ngi la ai suo moto sha baroh ki principal secretary ïa kaba ngi dang ap ïa ka jubab,” la ïathuh u Sangma.
U la ïathuh ruh ba ka jingduhnong ka tnad taxation ka la kot sha ka T.89 lak, bad ruh ka jingduhnong ha ka excise duty jong ki jingdih pynbuaid ka long kumba T.57.83 klur eiei, bad kiwei ki jingduhnong. “Kumta kine ki dei ki bynta kiba ngi hap ban khmih, balei ki don ki jingduna? Kumta ngi la hap ban khot ïa ki principal secretary bad ai por ïa ki hynñiew sngi ba kin ai jubab halor ka show cause notice ba la ai da ka PAC,” u la ong.
