NONGPOH:
Haba kren ha ka jingïalang kaba la long ha Nongpoh ha ka 4 tarik Kyllalyngkot, u Bah Renikton L. Tongkhar, Myntri ka tnat PHE ha ka sorkar jylla, u la ong ba kum u myntri uba dei peit ïa ka kam sam umbam umdih ha ka jylla, u la ïaleh shitom ban pynïoh umbam umdih sha baroh ki paid ha ka jylla.
Ka jingkren na utei u Myntri, ka dei haba la buh mawnongrim, na ka bynta ban pynpoi um sha ki 20 tylli ki shnong kiba don ha ka thaiñ Nongpoh, kata naduh Mawtnum ter ter shaduh Shangbangla, kiba dei ki shnong kiba hap hapoh ka Nongpoh Census Town.
U Bah Renik, haba batai halor ka skim Jal Jeevan Mission, u la ong ba ha ka jingshisha katei ka skim ka dei beit tang ban pynpoi umbam sha kito ki shnong Nongkyndong ha ka jylla, ha kaba ki kito ki briew kiba shong ha ki shnong ba la long khap sor kim ïoh jingmyntoi eiei ruh na katei ka skim.
Shuh shuh, u la ong ruh, ba kum u Myntri ha ka sorkar jylla, haba u la ïohi ba dei tang ki paid na ki shnong Nongkyndong kiba la ïoh umbam na katei ka skim, kumta haba haba u la ïohlad ban shong jingïalang bad u Myntri ka Jal Shakti jong ka sorkar pdeng bad kaba la donlang da baroh ki Myntri na baroh ki jylla ka thaiñ Lam Mihngi, u la ïoh ban pynsngew sha u Myntri ka sorkar pdeng halor ka jingdonkam ban pynkylla ïa ka rukom pyntreikam haba sam umbam sha ki paidbah.
“Nga la phah jingthoh la bun bun sien sha ka tnat kaba peit ïa ka kam sam umbam jong ka sorkar pdeng, kata na ka bynta ban kyrpad ïa ki ba ki dei ban bhah kyrpang ha ka skim JJM na bynta jong kito ki shnong kiba hap ha Urban Areas, namar ha ka jingshisha hi ka long ba na ka skim JJM, ki ban ïoh jingmyntoi na katei ka skim sam umbam kan dei beit tang na kito ki skim kiba hap ha ki shnong Nongkyndong” ong u Bah Renikton L. Tongkhar.
“Ha ka jingïalang kaba nga la ïoh ban ïakren bad u Myntri ka sorkar pdeng, u la sngewdei eh ïa kaei kaba nga la pynsngew sha u bad dei halor kata ka nongrim kaba la urlong ruh ha ka jylla, ba ki shnong kiba la lait na ka thup shnong nongkyndong ne Rular Areas ba kin ïoh ïa katei ka jingmyntoi bad kaba nyngkong eh ban pyntrei ïa katei ka skim kan dei na Nongpoh bad kan sa treikam sha kiwei ruh ki jaka ha ka jylla,” u la bynrap.
