SHILLONG:
Ka dorbar tlang ka Khasi Hills Autonomous District Council (KHADC) ka la kem khluid kynsan shiphang hadien ba ki MDC kila ïakura miej na ka daw ba wanrah u MDC ka Mylliem u Bah Ronnie V Lyngdoh, uba kynnoh ba ka jingphet noh ka Kompeni shna surok 4Lane na Umshyrpi sha Bañiun, ka lah ban dei na ka jingdawa ka KHADC haduh T. 1 klur ban ai No Objection Certificate (NoC) ne Trading License.
Haba jubab halor kane u Executive Member (EM) u Bah Rangkynsai Kharbuki uba dei peit ïa ka tnad Trade ka Council, u la kyntait war bad u la ong ba kane ka dei ka jingkynnoh kaba khlem nongrim bad u la byrthen ba kum kane ka jingkynnoh khlem ki sakhi kiba biang kan pynjah burom. U Bah Rangkynsai u la tied miej ruh bad u la dawa ba u MDC u dei ban weng noh ïa kane ka jingkynnoh.
Kane ka jingdawa u EM ban weng noh u Bah Ronnie ïa kane ka jingkynnoh, ka la pynkhie bitar ruh ïa u nongïalam ka liangpyrshah u Bah Pynshngain N Syiem uba la ïeng bad tied miej tdam. “Phi dei uei ban dawa weng ïa ka motion jong u dkhot ka ïing dorbar. Katkum ka rule tang u Chairman uba lah ban rai”, la ong u Bah Pynshngain.
Kumjuh ruh u Bah Ronnie haba ïeng biang halor kane, u tied miej kumjuh bad u la ong ba da ka sur kaba jam, ba kum u dkhot u la wanrah ïa kane ka mat ban ïoh ïa ka jingshai na ka Executive Committee khamtam na u EM uba dei u khlieh jongka tnad.
“Wat tied miej, wat shim kum ka kam shimet, nga rah ïa ka mat. Nga ong ba nga shu ïoh sngew, la ka dei ne em kaba shisha, ba ka KHADC ka pan haduh T. 1 klur ban ai NoC na ka kompeni shna surok 4 Lane na Umshyrpi sha Bañiun kaba phet noh syndon. Haba don ka ding ka don ka tdem”, la ong u Bah Ronnie.
Haba wanrah ïa kane ka mat, u Bah Ronnie ula ong ba ka Council kam dei ban shu ai trading license pathar hynrei ki don ki jait kam kiba ki briew lajong kim pat lah, ka hap ban pyrkhat lada kan long ka jingmyntoi ïa ki paidbah trai shnong. U la ai nuksa ba ka Ïewduh ka la jyllei da ki briew ki bym dei shuh ki Khasi haduh ba lada leit ïew, ym sngew dei shuh ba ka dei ka ïew Khasi.
“Ka nuksa ha Ïewduh, la jyllei kiwei ki jaitbynriew. Lada rung ha Ïewduh ym sngew dei shuh ka ïew Khasi ba la jyllei kiwei ki jaitbynriew. Imat la shu ai pathar ïa ka trading license”, la kynnoh u Bah Ronnie.
Hynrei ha kajuh ka por, u la ong ba lada don ki kam ba ki trai shnong kim pat lah ban trei, lah ban ai ïa kiba nabar ryngkat ki kyndon. “Haba ki kontraktor jong ngi kim lah ban trei, lah ban ai ïa kiwei ryngkat ki jingpyrkhing”, la ong u Bah Ronnie.
U la kynnoh ruh ba ka kad liengsuiñ ha Umroi ruh ka la sahteng namar ba ka KHADC ka la shah kynnoh ban ai jingbit, ha kaba ha ka jingshisha, ka la dei ban peit da kumwei namar ba kum kane ka projek kan wanrah ka jingmyntoi ïa ka jylla bad ïa ki trai shnong.
“Lada dei ka kam kaba plie lad ïa ki samla jong ngi, dei ban ai NoC hynrei lada ka khang lad ïa ki samla dei ban pyrkhat bha”, la ong u Bah Ronnie.
