SHILLONG:
Ki Shipai ka Border Security Forces (BSF) ki la kem noh ïa ki 3 ngut ki shipai BSF ki ba la kynnoh donkti ban siat pynïap ïa u Bah Ronningstar Nongkynrih ha ka miet jong ka 5 tarik Jymmang ha ka shnong Mawshun.
Lah ban kdew hangne ba u Bah Roningstar Nongkynrih, 32 snem ka rta na ka shnong Jalynteng, Nongkynrih u la shah siat ïap ha ki shipai BSF ha ka 5 tarik Jymmang ha ka shnong Mawshun East Khasi Hills District ha ka por ba u dang kit ïa ki masi ha ka trok.
Hadien saw sngi, ka jingshah siat ïap jong u Bah Ronningstar, ki shipai ka Border Security Force (BSF), ha ka 8 tarik u Jymmang, ki la kem noh ïa ki 3 ngut ki shipai, ki ba la kynnoh ba ki donkti ban siat ïap ïa u Bah Ronningstar.
“Ïa kine lai ngut la kem ha ka 8 tarik Jymmang, bad ïa uba la siat ïa u ne u nongñiah trok ka tnad ka la dep ban wengkam shipor bad la set ïa ki ha quarter guard”, la ïathuh u BSF IG u Pradip Kumar.
Kine ki lai ngut ki shipai BSF ki ba la shah kem ki dei kiba la tip kyrteng kum u Moni Singh u ba don ha ka kyrdan Head Constable, u Sengel Singh Tudu u ba dei ha ka kyrdan Constable bad u nongñiah kali BSF u Kadam Kishore Baburao.
Hadien kane ka jingjia u BSF Meghalaya Frontier Inspector General, u Pradip Kumar u la hukum ban thung da ka Court of Enquiry ka ba la lamkhmat da u ophisar ha ka kyrdan DIG, bad dei hadien kane ka jingtohkit, la ai ka hukum ban kem noh ïa ki 3 ngut ki shipai BSF.
Katkum ka jingïathuh une u ophisar,la ong ba u head constable, u la pyndonkam ban siat da ka Beretta SMG, lai round kaba la pynlong ïa u Bah Ronningstar ba un khlad noh ha shen.
U BSF IG, u Pradip Kumar u la ïathuh ruh, “U Head Constable u ba la shah kem u la phla ïa ki ophisar ka BSF kiba tohkit ïa kane ka jingjia ba u la siat ïa u Bah Ronningstar ha ka jingïada ïalade namar ba u nongñiah u thmu ban ñiah ïa ka kali sha ka jaka ba don ma u bad ha ka jingtieng ba ïoh u tynrah ïa u”.
Halor ka jingjia ha Pyrdiwah u IG ka BSF u la ong ba ka la don ka jingjia ba don na ki katto katne ngut ki riew bynman ki la wan ha Borhill bad thang ïa kawei ka jaka sah jong ki shipai.
Lah ban kdew hangne ba ki kynhun jong ki briew bym lah ban tip, hynnin ka miet kila wiang ding ïa ka sem pahara ki shipai Border Security Force ( BSF) ha Lyngkhat, kaba hap hapoh ka Pynursla Sub Division.
