MAWKYRWAT:
Uwei u briew uba dei nabar jong ka Jylla Meghalaya u ba dei u nongwan shangkai pyrthei mynta ka sngi u la ngam jyllop noh ha kawei ka wah kaba don ha Od-Ringai, Mawten, South West Khasi Hills District.
Kane ka jingjia katkum ka tyllong khubor na Fire & Emergency Service, South West Khasi Hills District, la ïathuh ba ka la jia ha 13 tarik u Lber, 2023 ha ki por kumba 10 baje eiei mynstep ha kaba ïa utei u briew u ba la tip kyrteng u Abishek Kumar Mondal, 24 snem ei ei uba dei na ka jylla Jharkhand bad uba pule ïa ka Chemical Engineering hapoh IIM, Guwahati, u la ngam jyllop ha kawei ka wah kaba don ha Od-Ringai (Natural Swimming Pool) kaba dang hap hapoh ka Shnong Mawten, South West Khasi Hills District bad kane ka jaka ka jngai kumba 2 kynta duna ei ei haba ïaid da ka kjat na ka jaka ba lait kali.
Shuh shuh katkum ka jingïathuh utei u samla u la ngam jyllop ha ka pung kaba jylliew kumba 20 phut ei ei bad ïa ka met jong u la ïoh ban sei noh da ka kynhun napoh ka Fire & Emergency Service, South West Khasi Hills District ha ki por kumba 4 baje ei ei janmiet.
La ïathuh ruh ba kiba ïa leit lang bad u Abishek Roy ha kane ka sngi ki don kumba 5 ngut ei ei.
