NONGPOH:
Uwei u heprit ba 9 snem ka rta u la duh ei la ka jingim haka 20 tarik Jylliew, hadien ba u la ngam jyllop ha ka Wah Umtrew.
Kane ka jingjia ka la jia ha ka por kumba 10 baje mynstep ha ka shnong Amtola, kaba don hapoh Byrnihat hapoh Ri-Bhoi District ha ka por ba une u heprit u dang ïalehkai bad ki para kynthei bad katto katne ki paralok.
Katkum ka jingïathuh ki sakhi, une u heprit ba la tip kyrteng kum u Asabul Ali, u dang ïalehkai bad ki para kynthei ryngkat bad ki paralok hajan ka Wah Umtrew ha kaba u la btuid bad leit hap ha kane ka wah.
Katkum ka jingïathuh jong uwei uba ïohi ïa kane ka jingjia, u la ong “Ki nongkhwai dohkha, kiba don sha shiliang wah, kim lah ban pynlait im ïa u. Ka para kynthei jong une u khynnah ka la mareh sha ïing ban pyntip halor kane ka jingjia, bad wut wut na ïing ki la wan sha kane ka jaka. Hynrei kim lah ban leh eiei”.
Ki la ïathuh ruh ba hadien ba la jia kane ka jingjia, ki la pyntip sha ki pulit ka jylla ha Byrnihat Outpost hynrei ymdon ba wan. “Kumta ngi la kyrpad ïa ki pulit ka Assam ba kin wan pynlait. Ki la phah ïa ka Emergency and Rescue Team jong ki hynrei sniewbok, kim lah shuh ban pynlait ïa une u khynnah”, la ïathuh kiba don ha kane ka jingjia.
La lah ban sei noh ïa ka met jong une u khynnah ha ka por kumba 1baje nohphai sngi da ka kynhun ai jingïarap jong ki pulit ka Assam.
Haba kren bad u nongthoh khubor, kine ki ar ngut ki nongkhwai dohkha kiba don sha shiliang ka wah ki la ïathuh ba ki la pyrta briew ban ïarap ïa une u khynnah.
Katkum ka jingïathuh kine ki nongkhwai dohkha, “Ki don ar ngut ki khynnah kynthei ryngkat bad une u khynnah shynrang, ki la ïalehkai hajan kane ka wah, lah ban dei namar ka jingshit palat, ki la pyrshang ban hiar ha kane ka wah hynrei une u khynnah u la btuid. Namar ba u dang rit palat um pat lah ban jngi, kumta u la ngam jyllop”.
Kine ki nongkhwai dohkha ki la ïathuh ruh ba kim lah ban ai jingïarap ïa une u khynnah namar ka wah ka long kaba heh. “Ka wah ka long kaba heh bha, kumta ngim lah ban leit jngi sha shiliang ban ïarap ïa u”, ki la ong.
