SHILLONG:
“Nga la shu thiah lang kumba nga la ïap bad kun kat ba lah wat la ngam sngew lah shuh namar nga la sngewbynnud palat ïa u hymmen la de”, ong u Bah Riborskem Nongkynrih, uba dei u para arkmie jong u Bah Roning Nongkynrih u nongñiah trok u ba la shah siat ïap ha ki shipai Border Security Forces (BSF) ha ka miet jong ka 5 tarik Jymmang.
Lah ban kdew hangne ba u wei u nongñiah trok ba kit ïa ki masi u ba la tip kyrteng kum u bah Roning Nongkynrih u ba dang 34 snem ka rta, u la shah siat ïap ha ki shipai Border Security Forces (BSF) ha ka surok Pynursla-Dawki hajan ka shnong Mawshun ha Pynursla.
Na ka liang u Bah Riborskhem u para arkmie jong u Roning Nongkynrih, u ba dei u nongbud ïa ka trok ba ñiah da u Bah Riborskhem Nongkynrih u la ïathuh ba ha ka 5 tarik mynmiet ha ka por 11 duna baje eiei ki la leit bylla ban kit masi na Laitlyngkot ban wanrah ha sem”.
“Hynrei ha ba la poi hangne ka jaka ngi ïohi ïa ki shipai bad khlem sngew-thuh sngewthaw nga shu ïoh sngew beit ba riew u kuli, bad ka kali ruh ka la ïap noh ha kane ka por bad nga peit ïa u hymmen ym ilong shuh bad nga la shu kdup ïa u hymmen u ba la lyngkien da ka snam bad nga ruh nga la leh kum ba la ïap ïa lade”, u la bynrap.
U Bah Riborskhem u la ïathuh shuh shuh, “Nga mut ban phet na kane ka jaka hynrei ngam sngew nud bad nga la shu dem lang hajuh namar ba ki la wan ban peit ïa ngi ha kali, nga la shu peit tuh ïa ki bad hadien ba ki la phet na kane ka jaka nga sa mih noh na kali”.
“Ngi wan ban bylla khnang shane namar ban ïoh khaw na ka bynta ki khun hynrei ngam poi pyrkhat ban long haduh katne pat kumba la jia ïa u hynmen jong nga”, u la ong.
“Kane ka jingjia ka la jia ha ka por 11 duna eiei bad ngi dang ïaid bad kynsan shu ïohi ïa ki shipai BSF bad u hynmen jong nga u ong ‘ni ki shipai’ hynrei shu kynsan shu riew beit u kuli”, u la bynrap.
“Ngam poi pyrkhat ba ki shipai BSF kin pyndonkam da ka suloi bad ngam shem la nud shuh ban khih ruh namar lada nga khih ka mut nga ruh nga la shah siat lang tharai kumta nga la shu thiah beit wat la ngam lah shuh ban kun namar ba nga la bynnud palat ïa la u hymmen lajong”, la ong u Bah Riborskhem.
Ha ka ba ïadei bad kane na ka liang ka KSU South Center Circle kan pynlong ïa ka jingïalang ha ka sngi nyngkong, ka 8 tarik Jymmang ban dawa ban khang ïa ki shipai ba kin ïaid pahara ha kine ki thaiñ ki ba jngai na khappud.
