NONGPOH:
Ki la don arngut ki briew ïa kaba la tip kyrteng kum u Abdullah Hussain bad u Sanborlang Khaiong, ki la shah kem noh ha ki Pulit ka Byrnihat Police Outpost, kata ka la jia halor ka jingshah kynnoh ba ki la donkti ha ki kam ban khaïi beaiñ ïa ka Ksiar.
Katei ka jingïohkem ki pulit ïa kitei ki arngut ki briew, ka dei hadien ba ki la ïoh jingtip ba ki don ki briew ki ba thmu ban shalan beaiñ ïa ka ksiar lyngba ka surok bah NH-6 bad kaba thmu ban pynpoi sha Assam, kumta haba ki Pulit ki la pynap shrip ha Byrnihat, ki la ïohkem shisha ïa kitei ki briew.
Ïa kitei ki arngut ki briew, la ïoh ba kem na kawei ka kawei ka kali Scorpio kaba don ïa u number AS-01-EJ-6407, ha kaba ki pulit ynda ki la talasi na katei ka kali, ki la lap ïa 20 tylli ki song biskit kaba la thep ksiar, ha kaba la ong ba la thep 10 tola ka ksiar ha kawei ka song biskit bad kaba la ong ba katei ka Ksiar ka shongdor kumba T. 65 hajar shi tola.
Haba ïadei bad katei ka jingjia, ki Pulit haba ki la ïoh ban kem ïa kitei ki arngut, ki la pynlong ïa ka jingtohkit kaba kham bniah, bniah khanng ba kin nanglap shuh shuh ïa kiwei kiba la donkti ha katei ka kam.
