SHILLONG:
U Bah Ardent Miller Basaiawmoit u President ka Voice of the People Party (VPP), u la ong ba ka jingïakhih jong ngi, ka long na ka bynta ban dawa ban pynbeit ïa ka reservation policy, ym ba ngi ïalehkai ïa ka ding.
Lah ban kdew hangne ba ha ka 26 tarik Jymmang, u Myntri ka tnad pule puthi ka jylla u Rakkam A Sangma u la kynnoh ba ka jingïakhih ka VPP ban dawa pynbeit ïa ka reservation policy ka dei ka ba ki ïalehkai ïa ka ding ka ban thang lut ïa baroh.
“Ngam tip ka ei ka jingmut jong u ba u kynnoh ba ngi ïa lehkai ïa ka ding, namar ngi ïakhun ban pynbeit ïa ka policy ka ba bakla, ka ba noh shilliang bad ka ba wanrah shibun ka jingduhnong ïa ki khun samla jong ngi”, u la ong.
U la bynrap “Kam dei ka jingïalehkai ïa ka ding hynrei ka dei ka jingïaleh na ka bynta ka bit ka biang ki samla wad kam wad jam bad ban pynbeit ïa kane ka policy bhah thungkam jong ka sorkar” .
U Bah Ardent u la ong shuh shuh ba “Ka long ka jingïalam bakla ban ong ba ka jingdawa ka dei ka ban pynduh nong ïa ki ba wad kam namar hadien ba nga la shong shah jingit hangne ki ba bun na ki samla ki ba don hapdeng ka jingwad kam wad jam ki la wan ban kyrshan ïa nga, namar ki sngew donkam ban pynsangeh shwa ïa ka jingthungkam thungjam kat ba ym pat lah ban pynbeit ïa ka reservation Policy” .
U la bynrap “Ka jingkren jong u Myntri ka pule puthi ka long tang na suiñ namar ka kam napoh ka paw ba ki samla wad kam ki ai ka jingkyrshan ka ba khraw ïa ngi”.
Halor ka jingwan ai mynsiem lang ki riewpawkhmat na ki seng saiñpyrthei bapher bapher ha ka jylla u Bah Ardent u la ong, “Ka jingwan jong ki riewpawkhamt na ki seng saiñpyrthei ba pher bapher bad ki sengbhalang, ka pawshai ba ki ruh ki sngew ïahap ïa kane ka jingdawa ka VPP”.
“Lada kim ïahap bad kyrshan ngam tharai ba kin wan ban ai mynsiem, lada ki wan ban ai mynsiem ïa ka jingïakhih ki la sdang don ki seng saiñpyrthei ki seng bhalang ki ba la sngewthuh ba ka jingdawa ka VPP ka dei ka ba shnongnia bad don nongrim”, u la bynrap.
U Bah Ardent u la ong shuh shuh ba nangne shakhmat un dang bring ïa ka jingshah thngan marwei namar lada shong shah thngan marwei lane shibun ruh lada ym skhem kan ym poi sha ka jingjop.
