SHILLONG:
Ka Myntri jong ka sorkar jylla ba dei ruh ka chairperson jong ka Roster Committee, ka Kong Ampareen Lyngdoh ha ka 27 tarik Jylliew ka la ïathuh ba shen ka Search Committee kan sa pyllait ïa ki kyreng jong ki riewstad (experts) kiban don bynta ha ka Expert Committee ban khmih ïa ka Reservation Policy.
“Ka jingwad ka dang ïaid shakhmat,” la ong ka Kong Ampareen hadien ba la dep ban pynlong ïa ka jingïalang kynhun myntri hynne ka sngi.
Ka Kong Ampareen ka la ong ruh ba ka committee ba ka peit kam dei ka jingpyn ïaid kaba lah ban batai. “Watla kata ngi la thaw ïa ka committee jong ki riewstad bad mynta ngi don hapdeng ka kamram ban wad ïa ki dkhot kiba lah ban trei lang,” ka la ong.
Ka la ai ka jingpynshai ba kan don ka expert committee ban khmih ïa ka Reservation Policy bad baroh ki seng saiñ pyrthei kin sa ïoh ka lad ban wanrah la ki jong ki jingai jingmut bad ki lad ki lynti ban wanrah hakhmat ka committee.
“Kumta, kam don ka jingsheptieng ïa ki saiñ pyrthei namar kane kan sa lah ban pynbeit. Ka lah ban kham shimpor namar ka dei ka kam kaba khia, hynrei baroh ki seng saiñ pyrthei kin sa ïoh ka lad ban wanrah ïa ki jingmut jong ki hakhmat ka committee,” la ong ka Kong Ampareen.
Ka Myntri ka la ban jur ba haba ïadei bad ka jingpyn treikam ïa ka roster, ka don la ka jong ka committee bad ki jingeh bad jingai jingmut jong ki seng saiñ pyrthei bapher bapher ki lah ban wanrah hakhmat ka committee.
Haba kylli lada ka committee kan khot lang ïa kiwei ki kynhun rit paid kiba dawa ba dei ban ïoh 15 per cen reservation, na ka liang ka Kong Ampareen ka la ïathuh ba la dep ban don jingïalang bad ki nongmihkhmat ha ki taïew ba la dep ha kaba la ïakren bad ki dkhot ba kin phah ïa ka shithi tyrwa jong ki.
