SHILLONG:
Ki nongïalam ka Harijan Panchayat Committee (HPC), ki la pynpaw ïa ka jingbym sngewhun jong ki bad kyntait mardor ban pdiang ïa ka blueprint ka ba ka Sorkar ka la dep ban phah sha ki, halor ka jingpynkynriah noh ïa ki na Them Ïew Mawlong.
Katkum ka kyrwoh ka ba la wan na ki nongïalam, ka Harijan Panchayat Committee (HPC) la kdew ba ka la phah da ka jubab ka ba 6 sla sha u Deputy Secretary jong ka Sorkar Meghalaya bad kiwei pat ki tnad ba ïadei bad kane ka bynta.
Ka HPC halor kane ka blueprint ban pynkynriah jaka ïa ki nongshong shnong kiba shong ha Them Ïew Mawlong, kaba ki khot ka Punjabi Lane, ka la ong ba hadien ka jingïaphylliew jingmut ba bun wat bad ki dkhot jong ka, da kawei ka jingmut ki la pynpaw ba kane ka jingtyrwa jong ka sorkar jylla ka long “bym pat biang, bym ïahap, bym pat pynkhreh, ka bym shonghok bad ka bym don ka synshar paidbah”.
Ka HPC ha ka jubab ba hynriew sla ka la ong ba ka don kaei kaei kaba long thylli bad ka rai ka bym sngewtynnad ha kane ka jingtyrwa jong ka High-Level Committee jong ka sorkar Meghalaya.”Ngi sngewkyndit ba naduh ba la thaw ïa ka sorkar thymmai, ki myntri, ki MLA bad katto katne ki kynhun ki la kren khlem nongrim da kaba ong ba kine ki jingeh lah ban pyndep tang hapoh u bnai Ïaïong. Da ka jadu aiu ki don ban pyndep ïa kane ka mat tang hapoh da ki sngi? Kane ka kam ka dei kaba dang sah ha ka aiñ bad ki shu kren tang ka ktien ban pynhun ïa ka iingbishar. Ngin nym pyndem ha ki buit politik”, la ong ka HPC.
Ka HPC ha ka kyrwoh ka la ong ruh ba ki la leit ha ki jingïalang jong ka sorkar da ka jingshaniah skhem hynrei ka sorkar ka ai jingtip bakla bad pynbakla lyngba ki lad pathai khubor bad ha ka jingïalang, ka long tang ban pynbiej ïa ki ban hun ha kane ka jingtyrwa jong ka sorkar. “Ka kyntien jong kine ki nongïalam ka long tang ban pyntieng. Ki buh ïa ka jingim bad jingdon jingem jong ngi ha ka jingma bad pynlong ïa ngi ki ban mad jingeh”, la ong u Secretary ka HPC, u Gurjit Singh.
Ka HPC ka la kynnoh ruh ba kane baroh ka dei tang ka jingthmu pynkynriah ka bym shong nongrim, kaba ktah ïa ki nongshong shnong ka Punjabi Lane (Them Ïew Mawlong) ba kin duh ïa ka hok jong ki, ka nam bad ka jingsngewbha halor kane ka lyngkhot khyndew kaba rit bad ban pdiang ïa kane ka jaka sah kum ka along kaba ki la ai lyngba ka blueprint.
Haba kren sha ki lad pathai khubor u Gurjit Singh u la ong, “Ka jingdawa jong ngi kaba don ha ka point baphra jong ka resolution kan ieng bad ngin nym pyndem ha kino kino ki buit politik namar ka long kaba dei ïa ka sorkar ban leh ïa kane bad tang namar ba ka jingïaid ka por, kane ka jaka ka la kylla kaba ïohnong”.
Ka Harijan Panchayat Committee ka la ong ruh, lyngba bun ki jingeh, hynrei ka la ïaleh na ka bynta ka hok ki nongshong shnong jong ka ha kine ki laiphew snem ba lah leit bad ha ka jubab jong ka sha ka sorkar ka la ong ruh ba kane ka jaka ba ïakajia ka dei jong u Syiem Mylliem bad kamdei jong ka sorkar bad kano kano ka jingthmu jong ka sorkar ban thied ïa ka, ka long ka jingpynkheiñ ïa ka Meghalaya Land Transfer Act.
Ha kaba ïadei bad ka jingjia ha ka 31 tarik u Jymmang 2018, ka HPC ka la kynnoh ruh ba ka dei tang ka jingshim kabu halor ka jingjia kaba rit bad mih kynsan sa ka jingthmu pynkynriah na ka bynta ka jingmyntoi saiñpyrthei. Ka la ong ruh, “Ngi don baroh ki kot ki sla kiba donkam ban shong kum ki nongshong shnong ha kane ka jaka ki kmie ki kpa tymmen jong ngi hapoh Punjabi Lane”.
Ka HPC ha ka jubab sha ka sorkar ka la ïathuh ruh ba ka la kdew ïa kiba bun ki jingduna jong kane ka blueprint ba la ai da ka sorkar da kaba ong ba ka jaka ka rit palat bad ki iing kiba rit, kaba pynkhein ïa ki aiñ jong ka building, kam don kano kano ka jingkdew ban pynduh ïa ki jingtei kiba don mynta, kam don ki jingdonkam paidbah bad kaba khatduh eh ba kam don kano kano ka kyrteng ba thikna jong ka jaka lane ki iing.
“Ki don shibun kiei kiei ki jingduna. Ka sorkar ka dei ban pynshai halor kine ki jingeh bad tang lada kumta lah ban ïapyrkhat pat da ka Harijan Panchayat Committee, khlem da ktah ïa ka hok jong ngi ban kyntait ïa kane ka jingtyrwa”, la ong u Gurjit Singh haba kren sha ki lad pathai khubor.
Haba kren halor ka jingleh kyrkieh ka sorkar, ka HPC ka la ong ba ka don ka aiñ hapoh ka Supreme Court jong ka India bad kiwei pat ki iingbishar kumjuh ba ymlah ban pynkynriah ïano ïano sha ka jaka ka bym bit bym biang ban shong ban sah bad dei halor kane ka nongrim, ki don ka hok ban ïoh da kawei pat ka jingpynbeit kaba kham bha.
U Gurjit Singh u la ong ruh ba ka sorkar ka dei ban sangeh shisyndon ka jingkthong ïa ki bad ailad ïa ki ba kin tei ïa ki iing ki sem bad ki lah ban pynthikna ba kin wanrah pat ïa ka jingitynnad ha kane ka jaka. “Ki nongshong shnong jong ka Punjabi Lane ki kwah ban im ryngkat ka nam bad ka burom ha kane ka jaka jong ki kpa tymmen jong ki bad kam long kaba dei ban khein ïa ki kum ki nongwei. Ka jingpynbeit halor kane ka dei ban long kaba shongsuk, ba don ka jingïaieit, da ka jingïa ai kylliang bad kaba neh shirta, khlem da pynkheiñ ïa ki hok jong ngi”, la bynrap shuh shuh u Gurjit.
