SHILLONG:
Ka Myntri ka sorkar jylla, ba dei ruh ka chairperson jong ka komiti halor ka Reservation Roster, ka Kong Ampareen Lyngdoh, ha ka 19 tarik Jylliew ka la ong ba ka sngewthuh ïa ka jingangnud kaba khraw halor ka jingkular ka sorkar ban khmih noh ïa ka Reservation Policy, hynrei ka la ong ba shwa ban leh ïa kata donkam ban ïoh ïa ki jingthoh jingtar na ki seng saiñ pyrthei, ki dkhot ka civil society, ki NGO, bad kiwei kiwei.
Ka Kong Ampareen ka la ong, “Ngi donkam shwa ban ïoh ïa ki jingthoh jingtar na ki seng saiñ pyrthei, ki dkhot ka civil society, ki NGO, bad ngin peit bha ïa kita ki jingkylli ne ki jingai jingmut jong kita baroh, nangto ngin sa sngewthuh ki experts aiu donkam ban peit ban khmih halor kita ki jingkylli ne ki jingai jingmut kiba mih na ki jingthoh jong ki nongshong shnong sha ka sorkar jong ngi.”
Ka la ong ruh ba ki lah ban ïaid shakhmat tang hadien ba la ïoh ïa ki jingthoh jingtar, khnang ba lada ka poi sha kano kano ka Ïingkashari, kan ym don kano kano ka jingshah buh jingkylli ïa ka jingshong aiñ kita ki jingai jingmut jong ki seng bapher bapher.
Ka la ong ruh ba kane kam dei ka kam kaba suk hynrei ka la ong ba kin sa leh kloi ïa kane ka kam watla ka lah ban shim por da ki taïew ne bnai ruh. “Ngi kyrmen ba ki paidbah kin don ka jingshaniah haba ngi ong ba ngin khmih biang ïa kane ka kam. Ngin sa ïa peit kumno ban leh bad shano kan ïalam,” la bynrap ka Kong Ampareen.
