SHILLONG:
Na ka liang u Symbud Myntri Rangbah, u Bah Prestone Tynsong, uba bat ïa ka tnad kam pohïing bad uba dei ruh u MLA ka Pynursla, ha kaba la don kane ka jingjia, u la ïathuh ba ki don saw ngut na kiba mynsaw, 2 na ki BSF bad 2 na ki riew paidbah.
Kane ka jingjia ka la jia ha ka shnong Umsyiem hajan Dawki ha ka janmiet jong ka 25 tarik Jylliew ha kaba la don ka jingïakajia hapdeng ki paidbah bad ki shipai BSF bad ka la don ruh ka jingkawang maw kaba pynlong ïa ki shipai ban siat kuli sha suiñ.
Na ka liang u Bah Prestone u la ong, ba katkum ka jingsngewthuh jong u, “Ka kynhun ki BSF ki la kem ïa ar tylli ki kali kiba kit ïa ki jaiñ sari bad la bat ïa kine ki ar tylli ki kali bad hadien ba la rah ïa kine ki kali sha ka jaka ki shipai ki nongñiah bad nongbud ki la lait phet noh”.
U Bah Prestone u la ïathuh ruh, “Hadien khyndiat por ba la don kane ka jingkem ïa kine ki ar tylli ki kali, ka la don ruh sa kawei pat ka kali ki riew paidbah kaba leit shajan ka jaka ba sah ki BSF bad ki don ki shipai kiba mih shabar ban ïakren bad kine ki briew kaba la wanrah sha ka jingïakajia hapdeng kine ki ar kynhun”. Na ka liang u Bah Prestone u la ïathuh ruh ba kane ka jingjia ka la jaijai mynta bad kamdon shuh kano kano kaba lah ban wanrah ïa ka jingïahuri hura.
Halor ka jingkam jong ki BSF ba ka dei ka kali jong ki nongkhaii beaiñ, na ka liang u Bah Prestone la ong, “Ngim pat lah ban ong eiei halor kane namar ka dang kloi palat”.
Ban tip khambniah halor kane ka jingjia, na ka liang u Bah Prestone u la ïathuh ba na ka liang ka sorkar ka la bthah ïa u SP ban tohkit halor kane ka jingjia ban lap ïa ka daw tynrai. “Mynta ngi dang ap ïa ka FIR la ka long na ki riew paidbah lane na ki BSF bad ym pat don haduh mynta ban ai FIR ha Police Station”, la bynrap shuh shuh u Bah Prestone.
Khnang ba kum kine ki jingjia kin ym jia shuh ha ki sngi ki ban wan, na ka liang u Symbud Myntri Rangbah u la ong ba un khot da ka jingïalang bad u IG jong ki BSF ban ïakren halor kane. “Shen ngan sa pynlong ka jingïalang bad u IG jong ki BSF bad ngin ïakren halor kane bad ha ka sien ba khatduh ba ngi lahdep ban ïashong jingïalang teng ngi lah dep ban ong ïa ki ba lada donkam kano kano ka jingïatreilang ba kin sngewbha ban pyntip shwa sha ki pulit ban lait na kano kano ka jingjia bym sngewtynnad”, la ong u Bah Prestone.
