SHILLONG:
Ki nongïalam jong ka seng Congress ki la mih sha khmat ban pynpaw ïa ka nongrim jong ka seng da kaba shai haba ïa dei bad ka Reservation Policy bad ruh halor ka roster system.
Haba ïakren bad u MLA ka Congress na Mawhati, u Bah Charles Margnar ha Congress Bhavan u la ïathuh ba ka seng ka sngewkhia halor ka long ka man jong ki paidbah bad ruh halor ka lawei jong ki samla ka jylla. U la pynpaw ïa ka jingsngewkhia halor ka mat kaba ki ba bun balang ki la pynpaw kata ban pynbiet noh ïa ka reservation policy bad ruh halor ka roster system.
Haba ïadei bad ka jingong kiba bun balang ba ka seng Congress ka sngap man man halor kine ki mat, u Bah Charles u la ong, “Ka Congress kam shym la sngap jar halor kine ki mat naduh ba sdang ka shim ïa kine ki mat ban ïatai sani bha. Hadien ba ka sorkar ka la khot sha ka All Party Meeting ngi la leit bad ïashim bynta.”
Ka seng Congress katkum ka jingïathuh jong une u nongïalam ka ïeng skhem ba ïaka roster system dei ban pyntrei kam nangne sha khmat ym ban pyntrei kam naduh ba ïoh ïaka jylla kata naduh u snem 1972.
U la kren shai ruh ba ka Congress kam shym la kyrshan ïaka sorkar ne don lang hapoh ka sorkar ba la lamkhmat da ka National People’s Party (NPP).
“Haba ka sorkar ka ïathuh ha ka19 tarik Jymmang ba kin thaw ïa ka committee ban peit bniah ïa ka jingpyntreikam ïa ka Roster System, ngi la pdiang ïaka,” ïathuh u Bah Charles.
U la bynrap da kaba ong ba ka Congress la bunsien ka la ïakynduh ban ïakren halor kine ki mat, wat haduh ba ki la thaw da ka komiti ban peit bniah ïa ka Roster System bad ka Reservation Policy’.
“Kane ka komiti kaba kyrpang kan ïathir sani halor kane ka mat bad ka seng kan sa pynbna paidbah bad pynsngewthuh ïa ka nongrim ba ka seng Congress ka ïeng,” u la bynrap.
Haba ïadei bad ka jingkynthoh ba ka Congress ka shim por ban pynbna paidbah ïa ka nongrim ba ka ïeng halor ka roster system, u MLA ka Mawhati u la ong ba ki shim por namar kane ka mat ka long kaba hap ban bishar bha bad ka bym lah ban shim rai kyrkieh.
“Ngim kwah ban shim rai kyrkieh namar ngim kwah ba ngin sa babe hadien bad ban buh jingeh ïa ki paidbha,” ong u Bah Charles.
Ha ka juh ka por halor ka Reservation Policy, u la ong mynta la 50 snem ba kane ka policy ka la jynjoh. “Ngi sngewthuh ïa ka jingeh kumba ki wei ki sngewthuh. Ngi don ka juh ka jingsngew kum kiwei pat,” u la ong.
U la bynrap ruh ba kano kano ka policy lah ban peit bniah biang ha man la ka 10 snem, kynthup ïa ka Reservation Policy.
U la kyntuh ïa baroh ki nongshong shnong ka jylla ba kim dei ban sngewthuh bakla ïa ka seng Congress bad ban shah ïalam bakla hano hano.
“Ka Congress ka ïeng skhem ha ka nongrim bad kan ïai ïeng na ka bynta ki paidbah jong ka jylla baroh ka wei,” u la bynrap.
